Polşalı azarkeşlər belaruslu məşqçini döyüblər

Polşanın “Zaqlembe” klubunun baş məşqçisi Aleksandr Xatskeviç azarkeşlər tərəfindən döyülüb.

“Report” “meczyki.pl” saytına istinadən xəbər verir ki, hadisə komandanın məşqi zamanı baş verib.

I Liqanın XXV turunda doğma arenasında “Katovitse”yə 0:4 hesabı ilə məğlub olan Sosnovets təmsilçisinin bugünkü məşqinə müdaxilə edən fanatlar futbolçularla söhbət etmək istəyiblər. Lakin sonda onların üzərinə şığıyan fan-klub üzvləri belaruslu mütəxəssisi yumruq və təpiklə vurublar.

50 yaşlı çalışdırıcının bu hadisəyə görə istefa verəcəyi gözlənilir.

Qeyd edək ki, Aleksandr Xatskeviç bu ilin yanvarından “Zaqlembe”yə rəhbərlik edir. Komanda turnir cədvəlinin sonuncu pilləsində qərarlaşıb.