Azərbaycan Premyer Liqası: “Araz-Naxçıvan” “Qəbələ”ni məğlub edib

Azərbaycan Premyer Liqasında II tura start verilib.

“Report”un məlumatına görə, açılış oyunu “Dalğa Arena”da keçirilib.

Bu mövsüm yenidən elitaya qayıdan “Araz-Naxçıvan” ölkə kubokunun son qalibi “Qəbələ”ni qəbul edib.

Hər iki komandanın ilk turda böyük hesabla məğlub olması bu görüşün prinsipiallığını daha da artırırdı. “Qırmızı-qaralar” favorit hesab edilsələr də, Naxçıvan təmsilçisi sürpriz nəticəyə imza atıb. 17-ci dəqiqədə belçikalı yarımmüdafiəçi İsmail Azzauri hesabı açıb. 83-cü dəqiqədə isə konqolu hücumçu Elvis Maşike fərqi iki topa çatdırmaqla Azərbaycan çempionatında ilk qoluna imza atıb.

Nəticədə 2:0 hesablı qələbə qazanan “Araz-Naxçıvan” hesabına ilk xalları yazdırıb. “Qəbələ” isə ardıcıl ikinci məğlubiyyətini alıb.

Qeyd edək ki, bu gün turun daha bir oyunu keçiriləcək. Saat 21:00-da başlayacaq görüşdə “Kəpəz” “Zirə”nin qonağı olacaq. Digər qarşılaşmalar isə avqustun 13-14-də oynanılacaq.