Nəriman Abbasov: "UFC-yə qaçmağa can atmıram"

Azərbaycanın MMA döyüşçüsü Nəriman Abbasovun "Report"a müsahibəsi

- Bu yaxınlarda Rusiyanın paytaxtı Moskvadakı "AMC Fight Nights"da yerli idmançı Marif Pirayevə vaxtından əvvəl qalib gələrək, çempionluq kəmərini növbəti dəfə qorudunuz. Əvvəlcə həmin döyüşlə bağlı təəssüratlarınızı bilmək maraqlı olardı...

- Düzdür, döyüş planlaşdırdığımız kimi keçmədi. Ondan da yaxşı alındı. Sevindirici haldır ki, çempionluq kəmərini müdafiə etdim.

- Görüşün 2-ci raunddan sonra başa çatacağını gözləyirdiniz?

- Əslində 5 raund döyüşəcəyimi gözləyirdim. Digər tərəfdən, bilirdim ki, rəqib bu qədər dözə bilməyəcək və mənimlə bacarmayacaq. Özünüz də gördünüz ki, Pirayev 2-ci raundun sonlarında müdafiə olunmaqda çətinlik çəkirdi. Adətən belə olan halda döyüşü dayandırırlar. Amma görüşü 3-cü raunda saxladılar.

- Halbuki rəqib döyüşdən öncə iddialı danışırdı...

- Əslində rinqə çıxmazdan əvvəl hamı iddialı danışır. Döyüşdən sonra isə kimin güclü olduğu bilinir.

- Mütləq Döyüş Çempionatında (UFC) iştirakınızla bağlı məsələ nə yerdədir?

- Gözləyirəm. Ora qaçmağa can atmıram. Qismət olar, vuruşaram. Təkliflər çoxdur, onlara baxacağıq. Ümid edirəm ki, yaxşı olacaq.

- Bəlkə həmin təklifləri elə indi açıqlayasınız...

- Hər şey dəqiqləşdikdən sonra tam ətraflı paylaşacağam. Təqribən 1-2 ay ərzində bütün suallara aydınlıq gələcək.

- Sizə UFC ilə bağlı Həbib Nurməhəmmədov söz vermişdi. Ondan sonra özü ilə danışmısınız?

- Çox gözlətdilər. Biz də bunu istəmirik. Deyirlər ki, yerlər doludur.

- Karyeranızla bağlı nə fikirdəsiniz?

- Cəmi 28 yaşım var. Mənim üçün hələ çox şey qabaqdadır.