Dünya çempionu olan para-üzgüçü Prezident İlham Əliyevə təşəkkür edib

“Bir ildir İngiltərənin Mançester şəhərində keçirilən dünya çempionatına hazırlaşırdıq”.

“Report” xəbər verir ki, bunu Azərbaycanın para-üzgüçüsü Vəli İsrafilov deyib.

O qeyd edib ki, idmançılar gözlənilən nəticəni göstərə biliblər: “Beləliklə, Roman və mən Paris-2024 XVII Yay Paralimpiya Oyunlarına lisenziya qazandıq. Ümidvaram ki, bu uğuru Parisdə də davam etdirəcəyik”.

İdmançı bildirib ki, ölkədə üzgüçülər üçün yaradılan şərait ən yüksək səviyyədədir: “Su İdman Sarayında məşqlərimizi keçirik. Sağ olsun cənab Prezident İlham Əliyev. Elə şərait yaradılıb ki, bizim hovuz Avropanın ən yaxşı beş hovuzundan biridir”.

Azərbaycanın digər para-üzgüçüsü Roman Saley bildirib ki, İngiltərənin Mançester şəhərində keçirilən dünya çempionatında bir çox ölkələr iştirak edib: “Biz çox yaxşı nəticə göstərdik. Bizim çıxışımız yüksək qiymətləndirilib”.