Böyük Dəbilqə: Azərbaycan cüdoçuları ilk gündə 3 medal qazanıb - YENİLƏNİB-5

Azərbaycanın daha bir cüdoçusu Bakıdakı Böyük Dəbilqə turnirində bürünc medal qazanıb.

"Report"un məlumatına görə, 66 kq-da Orxan Səfərov 3-cü yer uğrunda görüşdə serbiyalı Straxinya Bunçiçə qalib gəlib.

Bununla da Azərbaycan cüdoçuları ilk yarış günündə 3 medala sahib çıxıblar.

Daha əvvəl 60 kq-da Balabəy Ağayev 1-ci, Kəramət Hüseynov isə 3-cü yeri tutub.

Bakıdakı Böyük Dəbilqə turnirində 60 kq çəki dərəcəsində medal qazanan Azərbaycan cüdoçuları mükafatlandırılıb.

"Report"un məlumatına görə, 1-ci yerin sahibi Balabəy Ağayevə qızıl, 3-cü olan Kəramət Hüseynova isə bürünc medal verilib.

Mükafatları Azərbaycan Cüdo Federasiyasının prezidenti Rəşad Nəbiyev təqdim edib.

Azərbaycan cüdoçusu Balabəy Ağayev Bakıda keçirilən Böyük Dəbilqə turnirində qızıl medal qazanıb.

"Report"un məlumatına görə, 60 kq-da çıxış edən idmançı 1-ci yer uğrunda qarşılaşmada ukraynalı Dilşot Kalmatovla qüvvəsini sınayıb.

Əsas vaxtda hesab açılmayıb. Qızıl xal bölümündə rəqibini məğlub edən B.Ağayev fəxri kürsünün ən yüksək pilləsinə qalxıb.

Azərbaycan cüdoçusu Kəramət Hüseynov Bakıdakı Böyük Dəbilqədə bürünc medal görüşünə çıxaraq qələbə qazanıb.

"Report"un məlumatına görə, 60 kq çəki dərəcəsində yer alan idmançı 3-cü yer uğrunda qarşılaşmada ispaniyalı Fransisko Qarriqos ilə görüşüb.

Rəqibinə ipponla qalib gələn K.Hüseynov fəxri kürsünün 3-cü pilləsinə qalxıb.

Azərbaycanın iki cüdoçusu Bakıda keçirilən Böyük Dəbilqə turnirinin yarımfinalında üz-üzə gəlib.

"Report"un məlumatına görə, 60 kq çəki dərəcəsində yer alan Kəramət Hüseynov və Balabəy Ağayev finala gedən yolda qüvvəsini sınayıb.

Rəqibinə cərimə xalları ilə qalib gələn Ağayev adını həlledici görüşə yazdırıb. Onun rəqibi ukraynalı Dilşot Kalmatov olacaq. Hüseynov isə bürünc medal uğrunda qarşılaşmada ispaniyalı Fransisko Qarriqos ilə görüşəcək.

66 kq-da çıxış edən Orxan Səfərov yarımfinalda moldovalı Denis Vyeruya uduzub. O, bürünc medal görüşünə çıxacaq. Eyni çəkidə yarışan Kamran Süleymanov isə təsəlliverici qarşılaşmada məğlub olaraq, medalsız qalıb.

Azərbaycanın 3 cüdoçusu Bakıda bu gün start götürən Böyük Dəbilqə turnirində yarımfinala yüksəlib.

"Report"un məlumatına görə, 60 kq-da Kəramət Hüseynov və Balabəy Ağayev, 66 kq-da isə Orxan Səfərov finala vəsiqə uğrunda güləşəcək.

Mübarizəyə 1/8 finaldan başlayan Hüseynov Vijay Yadav (Hindistan) və Dilşodbek Baratova (Özbəkistan), Ağayev isə Şerzod Davlatov (Qazaxıstan) ilə Tsoqt-Oçir Byambacava (Monqolustan) qalib gəlib. İki cüdoçu finala vəsiqə uğrunda bir-biri ilə qarşılaşacaq.

Səfərov isə yarımfinaladək Munis Havsavi (Səudiyyə Ərəbistanı), Yanislav Gerçev (Bolqarıstan) və David Qarsiyanı (İspaniya) mübarizədən kənarlaşdırıb. Onun finala gedən yolda rəqibi Denis Viyeru (Moldova) olacaq.

66 kq-da yer alan digər Azərbaycan təmsilçisi Kamran Süleymanov bürünc medal uğrunda təsəlliverici görüşlərə qatılacaq.

Qadınların mübarizəsində isə 48 kq-da Leyla Əliyeva, Aişə Qurbanlı və Ramilə Əliyeva, 52 kq-da isə Gültac Məmmədəliyeva və Aydan Vəliyeva yarışı medalsız başa vurub.