Azərbaycan gimnastları “AGF Trophy” turnirinin son günündə 13 medal qazanıblar

Bakıda keçirilən idman gimnastikası üzrə “AGF Trophy” beynəlxalq turnirində son qaliblər müəyyənləşib.

“Report”un məlumatına görə, yarışın axırıncı günündə idmançılarımız 13 medal qazanıblar.

Böyüklər arasında milli üzvləri Nazənin Teymurova 2 qızıl (gimnastika tiri, sərbəst hərəkətlər), İvan Tixonov bir qızıl (dəstəli at), bir gümüş (turnik), Mənsum Səfərov bir qızıl (turnik), Rəsul Əhmədzadə bir gümüş (dəstəli at) medal qazanıblar.

Yeniyetmələrdə isə Albina Aliyeva birinci (gimnastika tiri) və ikinci (sərbəst hərəkətlər), Məhəmməd Rüstəmzadə birinci (turnik), Emin Xankişiyev ikinci (dəstəli at) və üçüncü (turnik), Aynaz Məcidzadə (sərbəst hərəkətlər) və Hüseyn Qəhrəmanov üçüncü (dəstəli at) yeri tutublar.