Yuxarı
    Bağlamaq

    SOCAR-ın Gürcüstanda apardığı danışıqların təfərrüatları açıqlanıb

    Görüşdə SOCAR prezidenti Rövnəq Abdullayev və Gürcüstanın baş naziri Georgi Kvirikaşvili iştirak ediblər

    Bakı. 13 yanvar. REPORT.AZ/ Bu gün Tbilisidə Azərbaycan Dövlət Neft Şirkətinin (SOCAR) nümayəndələri və Gürcüstan hökuməti arasında keçirilən görüşdə Gürcüstanın qış mövsümündə təbii qaza artan tələbatının tam ödənilməsi üçün mövcud qaz kəmərləri üzrə mövcud texniki vəziyyət və nəqlin artırılması imkanları ilə bağlı məsələlər müzakirə olunub.

    Bu barədə "Report"a Azərbaycan Dövlət Neft Şirkətinin (SOCAR) Gürcüstandakı törəmə qurumu - “SOCAR Energy Georgia” şirkətinin baş direktoru Mahir Məmmədov bildirib: "Gürcüstan bazarında qaza olan tələbat ildə təxminən 10% artır. Bunu nəzərə alaraq görüşdə əsasən Gürcüstanın artan tələbatının mövcud qaz kəmərlərinin texniki imkanları hesabına təmin edilməsi məsələlərini müzakirə etdik".

    M.Məmmədov bundan başqa görüşdə bir çox məsələnin müzakirə olunduğunu, hər hansı məsələ üzrə yekun razılıq əldə olunduqdan sonra bu barədə mətbuata açıqlama veriləcəyini bildirib: "Lakin əsas müzakirəmiz texniki imkanların artırılması, onun qış mövsümünə uyğunlaşdırılması barədə olub".

    Qeyd edək ki, görüşdə Azərbaycan tərəfdən SOCAR prezidenti Rövnəq Abdullayev, vitse-prezident Elşad Nəsirov, Sərmayələr İdarəsinin rəisi Vaqif Əliyev, Marketinq və iqtisadi əməliyyatlar İdarəsinin rəisi Ədnan Əhmədzadə, "SOCAR Energy Georgia”nın baş direktoru Mahir Məmmədov, Gürcüstan tərəfdən isə bu ölkənin baş naziri Georgi Kvirikaşvili, energetika naziri Kaxa Kaladze iştirak ediblər.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi