“SOCAR Energy Ukraine” 2018-ci ildə Ukraynaya 22,6 min ton təyyarə yanacağı idxal edib

Bakı. 18 yanvar. REPORT.AZ/ Azərbaycan Dövlət Neft Şirkətinin (SOCAR) Ukraynadakı törəməsi- “SOCAR Energy Ukraine” şirkəti 2018-ci il ərzində bu ölkəyə 22 632 ton təyyarə yanacağı idxal edib.

“Report”un Ukraynanın “A-95 Konsaltinq Qrupu”nun hesabatına istinadən verdiyi məlumata görə, bu, ötən il ərzində Ukraynaya  ümumilikdə idxal edilən təyyarə yanacağının 4%-ni təşkil edir.

Məlumata görə, 2018-ci ildə Ukraynaya idxal edilən təyyarə yanacağının ümumi həcmi 565,8 min ton olub. Bu isə 2017-ci ilin ümumi göstəriciləri ilə müqayisədə 68,4% çoxdur.

Qeyd edək ki, ötən il bu ölkəyə təyyarə yanacağı əsasən ənənəvi bazarlardan - Litva və Belarusdan gətirilib. İdxal edilən təyyarə yanacağının 37%-i dəmir yolu, 63%-i isə dəniz yolu ilə ölkəyə gətirilib. İdxalı əsasən 30 şirkət həyata keçirib.