"Moody's" SOCAR-ın baza kredit qiymətləndirilməsini yüksəldib

"Moody's Investors Service" beynəlxalq reytinq agentliyi Azərbaycan Dövlət Neft Şirkətinin (SOCAR) baza kredit qiymətləndirilməsinin (BCA) "ba3"dən "ba2"yə yüksəldib.

"Report" "Moody's"ə istinadən xəbər verir ki, eyni zamanda agentlik SOCAR-ın korporativ ailə reytinqini (CFR) "Ba1" səviyyəsində təsdiqləyib. Reytinqlər üzrə proqnoz "stabil"dir.

“Bugünkü reytinq qiymətləndirilməsi, BCA-nın yüksəldilməsi də daxil, əlverişli neft və qaz bazarı konyunkturasının fonunda SOCAR-ın yaxşılaşmış maliyyə və kredit göstəricilərini, şirkətin Azərbaycan hökuməti üçün strateji əhəmiyyətini göstərir. Həmçinin, investisiya xərcləri ilə bağlı strateji və səhmdar qərarlarının qəbul edilməsində son təcrübəni əks etdirir ki, bu da müsbət pul vəsaitlərinin yaranmasına və yaxşı likvidliyə gətirib çıxarır", -deyə Agetliyin məlumatında deyilir.

“Moody's” analitiklərinin fikrincə, SOCAR-ın biznes və maliyyə profili son illərdə dinamik karbohidrogen qiymətləri, artan hasilatla bağlı sabitlik və dayanıqlı ticarət əməliyyatları sayəsində möhkəmlənib:

"2021-ci ildəki 56 %-lik artımdan sonra şirkətin 2022-ci ildə gəliri 54 % artaraq 119 milyard manata (70 milyard ABŞ dolları) çatıb. “Moody's” tərəfindən düzəliş edilmiş EBITDA 2022-ci ildə 14 milyard manata (8 milyard ABŞ dolları) yüksəlib ki, bu da 2021-ci ildəki 7 milyard manat və 2017-20-ci illərdəki orta hesabla 4 milyard manatdan rekord həddə çatıb".

"Moody's” təxminlərinə görə, 2023-2024-cü illərdə SOCAR-ın gəlirləri neft qiymətlərindəki vəziyyətə uyğun olaraq illik 80-90 milyard manat arasında olacaq. Eyni zamanda EBITDA 2022-ci ilə nisbətən azalacaq, 2017-2021-ci illərə görə isə daha yüksək, təxminən illik 10 milyard manat ətrafında olacaq.

"Hökumətin SOCAR-a böyük təsiri olsa da, son vaxtlar hökumət şirkətin strateji və maliyyə idarəçiliyində daha çox nizam-intizam nümayiş etdirir. Bu, yüksək maliyyə göstəriciləri ilə yanaşı, müsbət pul vəsaitlərinin axını və mövqeyinin möhkəmlənməsi ilə nəticələndi. Şirkət 2019-2020-ci illərdə mənfi nağd pul axınından sonra 2021-ci ildə 2,6 milyard manat, 2022-ci ildə isə 6,8 milyard manat sərbəst pul axını qeydə alıb", - hesabatda deyilir.

“Moody's” SOCAR-ın növbəti 12-18 ay ərzində müsbət sərbəst pul axınının saxlanılmasını proqnozlaşdırır, lakin bu artım şirkətin investisiya proqramını həyata keçirməsindən, neft-qaz bazarındakı şəraitdən və səhmdarların strateji qərarlarından asılı olacaq.