"Masdar" Azərbaycandakı layihələrini genişləndirilməsi ilə bağlı hökumətlə müzakirələrə başlayıb

Birləşmiş Ərəb Əmirliklərinin "Masdar" şirkəti (Abu Dhabi Future Energy Company) Azərbaycandakı layihələrini genişləndirilməsi ilə bağlı hökumətlə ilkin müzakirələr aparır.

Bunu “Report”a “Masdar" şirkətinin Mərkəzi Asiya və Rusiya üzrə İnkişaf və investisiya Departamentinin rəhbəri Abdulla Zayed bildirib.

A.Zayed deyib ki, “Masdar” şirkəti günəş və külək enerjisi ilə bağlı layihələrin icrasında maraqlıdır: "Həmçinin Azərbaycanda hidrogendən istifadə imkanlarını da araşdırmaq istəyir. Bununla yanaşı, biz dövlətin bərpa olunan enerji ilə bağlı hədəflərinə çatmasında və qlobal iqlim dəyişikliyi çərçivəsində karbon dioksidini kompensasiya etməkdə hökuməti dəstəkləməyə hazırıq. “Masdar” şirkəti olaraq, bərpa edilən enerji sektoru ilə bağlı gələcək layihələrin hazırlanmasında hökumətə öz dəstəyimizi təklif edirik. Biz Azərbaycan bazarını sevirik, hökuməti ilə əməkdaşlıqdan məmnunuq. Beləliklə, biz çox işlər, layihələr həyata keçirmək istəyirik. Lakin bu hökumətin qərarından asılıdır. Əgər Azərbaycanda çox iş həyata keçirməyə icazə verilsə, biz hazırıq”.

Onun sözlərinə görə, “Masdar” şirkəti Azərbaycanla əlaqələrini və hazırda ölkədə icra etdikləri layihəni 2018-ci ildən inkişaf etdirməyə başlayıb: “Bu layihə Qaradağda inşa edilən 230 MVt gücündə günəş elektrik stansiyasıdır. Layihənin icra müddəti 18 aydır, günəş elektrik stansiyasının inşası növbəti ilin sonuna qədər tam formatda tamamlanacaq”.

A.Zayed deyib ki, Azərbaycanın Energetika Nazirliyi Qaradağda icra edilən layihənin inkişafında maraqlıdır: “Biz bu layihələrdə böyük inkişaf, nailiyyət əldə etmişik. “Masdar” şirkəti olaraq Azərbaycanda bötük potensial görürük. Biz Azərbaycanda çox işlər görmək istəyirik”.

Xatırladaq ki, investisiya dəyəri 250 milyon ABŞ dolları olan 230 MVt gücündə “Qaradağ” Günəş Elektrik Stansiyası layihəsini həyata keçirən “Masdar” şirkəti BƏƏ, Səudiyyə Ərəbistanı, İordaniya, Misir, Mərakeş, Böyük Britaniya, ABŞ, Avstraliya, Serbiya, Hindistan, İndoneziya, Özbəkistan və bir çox başqa ölkələr də daxil olmaqla 40-dan çox ölkədə fəaliyyət göstərir.