İran gündəlik neft hasilatını 4 milyon barrelə çatdıracaq

Mayın 25-də İran hökuməti İran Milli Neft Şirkətinin (INOC) neft hasilatını sutkada 400 min barel artıraraq 4 milyon barelə çatdırmaq planını təsdiqləyib.

“Report” xəbər verir ki, bu barədə Tasnim agentliyi məlumat yayıb.

İran İslam Respublikasının Birinci vitse-prezidenti, Prezidentin vəzifəsini icra edən Məhəmməd Moxberin sədrliyi ilə iqtisadi məsələlər üzrə hökumət komissiyasının xüsusi iclasında şirkətin neft hasilatının sutkada 3,6 milyon bareldən 4 milyon barelədək artırılması planı təsdiq edilib.

Aprelin 18-də “Financial Times” “Vortexa” analitik şirkətinin məlumatlarına istinadən yazıb ki, İran neftinin ixracı, əsasən, Çinə tədarük hesabına son altı ilin ən yüksək səviyyəsinə çatıb.

Nəşrin qeyd edib ki, 2024-cü ilin ilk üç ayında İran gündəlik orta hesabla 1,56 milyon barel neft tədarük edib ki, bu da 2018-ci ildən bəri ən yüksək göstəricidir.

OPEC-in məlumatına görə, İranın neft ehtiyatları ən azı 208,6 milyard barel təşkil edir.