Bu il Azərbaycan neft ixracını 7 %-ə yaxın azaldıb

Bu ilin yanvar-may aylarında Azərbaycandan ümumilikdə xarici ölkələrə 9,9 milyon ton neft (kondensatla birlikdə) ixrac olunub.

“Report” xəbər verir ki, bu barədə Energetika Nazirliyinin 2024-cü ilin yanvar-may ayları üzrə açıqladığı operativ məlumatlarında deyilir.

Bildirilir ki, bu, 2023-cü ilin yanvar-may ayları ilə müqayisədə 0,7 milyon ton və ya 6,6 % azdır.

Bu ilin ilk 5 ayında Azərbaycan Beynəlxalq Əməliyyat Şirkəti (ABƏŞ) 8,6 milyon tonu neft ixrac edib. Bu, 2023-cü ilin yanvar-may ayları ilə müqayisədə 0,9 milyon ton və ya 9,5 % azdır.

Ötən aylar ərzində Azərbaycan Dövlət Neft Şirkəti (SOCAR) neft ixracını 0,2 milyon ton və ya 18,2 % artıraraq 1,3 milyon tona çatdırıb.

Qeyd edək ki, Azərbaycan sahillərindən təxminən 100 km aralıqda yerləşən “Azəri-Çıraq-Günəşli” yataqlar blokundan ilk neft 1997-ci ildə hasil olunub.

Yataqlar blokunun işlənməsi üzrə hasilat bölgüsünə dair ilk müqavilə 1994-cü ilin 20 sentyabr tarixində imzalanıb. 2017-ci ilin 14 sentyabr tarixində isə həmin yataqların birgə istismarına və hasilatın pay bölgüsünə dair yeni saziş imzalanıb. Bu saziş yataqların 2049-cu ilin sonunadək işlənməsini nəzərdə tutur.

AÇG-də BP (30,37 %), SOCAR (25 %), “MOL Group” (9,57 %), INPEX (9,31 %), “Equinor” (7,27 %), “ExxonMobil” (6,79 %), TPAO (5,73 %), ITOCHU (3,65 %), “ONGC Videsh Limited” (OVL) (2,31 %) pay sahibidir.