Azərbaycan bu il 26,5 milyon ton neft hasil edib

Bu ilin yanvar-noyabr aylarında Azərbaycanda 26,5 milyon ton neft (kondensatla birlikdə) hasil edilib.

“Report” xəbər verir ki, bu barədə Energetika Nazirliyinin açıqladığı operativ məlumatlarında deyilir.

Bu, 2023-cü ilin 11 ayının göstəricisi ilə müqayisədə 1,1 milyon ton və ya 4 % azdır.

Hesabat dövründə respublika üzrə neft hasilatının 15,4 milyon tonu “Azəri-Çıraq-Günəşli” yataqlar blokunun payına düşüb. Bu, 2023-cü ilin yanvar-noyabr ayları ilə müqayisədə AÇG üzrə neft hasilatı 1 milyon ton və ya 6,1 % azdır.

“Şahdəniz” yatağından 3,8 milyon ton kondensat hasil edilib. Bu isə 2023-cü ilin 11 ayının hasilat göstəricisi ilə müqayisədə 0,1 milyon və ya 2,6 % azdır. Həmçinin, 0,52 milyon tonu (qaz kondensatı) “Abşeron” yatağının payına düşüb ki, bu da illik müqayisədə 280 min ton və ya 2,2 dəfə çoxdur.

Bu ilin 11 ayında Azərbaycan Dövlət Neft Şirkəti (SOCAR) üzrə neft (kondensatla birlikdə) hasilatı 6,8 milyon ton təşkil edib ki, bu da ötən ilin eyni dövrü ilə müqayisədə 0,3 milyon ton və ya 4,2 % azdır.

Qeyd edək ki, "Abşeron" yatağı Azərbaycan geoloqları tərəfindən 1960-cı illərdə kəşf edilib. Yataqda qaz həcminin 350 milyard kubmetr olduğu bildirilir.

"Abşeron" yatağı üzrə 2009-cu ildə Fransanın "Total" şirkəti ilə Azərbaycan Dövlət Neft Şirkəti arasında "Abşeron" yatağı üzrə kontrakt imzalanıb. 2023-cü ilin iyul ayında yataqda hasilata başlanılıb, həmin ilin avqustun 4-də Abu Dabi Milli Neft Şirkəti (ADNOC) ilə "Abşeron" qaz-kondensat yatağında 30 %-lik iştirak payının alınmasına dair Saziş imzalanıb. Hazırda SOCAR və "TotalEnergies" şirkətlərinin hər birinin iştirak payları müvafiq olaraq 35 % təşkil edir.

Azərbaycan sahillərindən təxminən 100 km aralıqda yerləşən “Azəri-Çıraq-Günəşli” yataqlar blokundan ilk neft 1997-ci ildə hasil olunub. Yataqlar blokunun işlənməsi üzrə hasilat bölgüsünə dair ilk müqavilə 1994-cü ilin 20 sentyabr tarixində imzalanıb. 2017-ci ilin 14 sentyabr tarixində isə həmin yataqların birgə istismarına və hasilatın pay bölgüsünə dair yeni saziş imzalanıb. Bu saziş yataqların 2049-cu ilin sonunadək işlənməsini nəzərdə tutur.

"Şahdəniz" perspektiv sahəsinin kəşfiyyatı, işlənməsi və hasilatın pay bölgüsü haqqında saziş 1996-cı il iyunun 4-də imzalanıb. "Şahdəniz" üzrə hasilatın pay bölgüsü (PSA) sazişi 17 oktyabr 1996-cı ildə ratifikasiya olunub. Bakıdan 70 km cənub-şərqdə yerləşən yataq 1999-cu ildə kəşf olunub.