AREA-nın yeni loqosu təqdim edilib

Energetika Nazirliyi yanında Bərpa Olunan Enerji Mənbələri Dövlət Agentliyinin (AREA) yeni loqosu təqdim edilib.

“Report”un Agentliyə istinadən verdiyi məlumata görə, loqo konsentrik çevrələr və yarımçevrələr üzərində yerləşən külək turbini təsvirindən ibarətdir.

Çevrələr enerjinin yayılmasını, külək turbini isə “yaşıl enerji” növlərindən biri hesab olunan külək enerjisini tərənnüm edir. Yenilənməyin rəmzi olan çevrənin sonu və başlanğıcı olmadığı kimi, bərpa olunan enerji də tükənməzdir, daim yenilənir və təbiətdəki balansı qoruyur.

Loqonun əsas rəngləri qara və yaşıldır. Qara rəng gücü, yaşıl rəng isə ekoloji təmiz bərpa olunan enerjini əks etdirir.