Şərurun Xələc kəndində məscid istifadəyə verilib

Dekabrın 24-də Şərur rayonunun Xələc kəndində yeni məscid istifadəyə verilib.

"Report"un yerli bürosu xəbər verir ki, açılış tədbirində iştirak edən Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsinin müavini Samir Seyidəhmədli qeyd edib ki, məscidin həm “Heydər Əliyev İli” çərçivəsində, həm də belə bir əlamətdar gündə istifadəyə verilməsi böyük rəmzi məna daşıyır. Vurğulanıb ki, Ulu Öndər Heydər Əliyev hər zaman islami dəyərlərə hörmət və ehtiramla yanaşıb.

Məscidləri, dini ziyarətgahlarımızı qoruyub, dini-mənəvi dəyərlərimizi yaşadaraq, inkişafına xüsusi diqqət göstərib.

S.Seyidəhmədli diqqətə çatdırıb ki, Xələc kənd məscidində yaradılan şərait milli-mənəvi dəyərlərimizin qorunmasının Prezident İlham Əliyevin ciddi diqqət mərkəzində olmasının əyani sübutudur.

Naxçıvan Muxtar Respublikası Dini Qurumlarla İş üzrə Dövlət Agentliyinin direktoru Vüqar Babayev qeyd edib ki, dövlət başçısının təşəbbüsü və tapşırıqlarına əsasən, ölkəmizin bölgələrində onlarla məscid, dini məbəd, ziyarətgah və tarixi abidələr inşa edilib və ya bərpa olunub. Digər çıxışçılar da 44 günlük Vətən müharibəsindəki zəfərimizə və bu ilin sentyabrında aparılan lokal antiterror tədbirlərinə diqqət çəkərək, bildiriblər ki, artıq bu gün Azərbaycanın bütün bölgələrində azan səsi duyulur.

Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi tərəfindən Xələc kənd məscidinə müqəddəs Quran hədiyyə edilib. Sonra məscidə baxış olub.

Qeyd edək ki, Xələc kəndindəki sözügedən ərazidə əvvəllər də məscid fəaliyyət göstərib. Lakin tam yararsız vəziyyətə düşdüyündən, yenisinin inşa olunmasına ehtiyac yaranıb. 1250 kv.m sahədə yerləşən məscidin tikintisinə Xələc kənd cəmiyyətinin təşəbbüsü və sakinlərin dəstəyi ilə ilə 2022-ci ilin avqust ayında başlanılıb. Məscid 1 gümbəz və 2 minarədən ibarət olmaqla, eyni zamanda 135 nəfərin ibadət etməyi üçün uyğunlaşdırılıb. Ərazidə yaşıllaşdırma və abadlıq işləri aparılıb.