Azərbaycandakı dini vəziyyət Vaşinqtonda müzakirə olunacaq

Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı ABŞ-a səfərə gedib. 

"Report"un məlumatına görə, Dövlət Komitəsinin sədrinin rəhbərlik etdiyi nümayəndə heyəti iyulun 16-18-də Birləşmiş Ştatların paytaxtı Vaşinqton şəhərində keçiriləcək Din Azadlığının İrəlilədilməsi üzrə 2-ci Nazirlər Konfransında iştirak edəcək.

Konfrans çərçivəsində “Azərbaycan – dini tolerantlıq modeli” mövzusuna həsr olunan "dəyirmi masa"nın təşkili planlaşdırılır. ABŞ Dövlət Departamentinin rəhbəri Mayk Pompeonun da iştirak edəcəyi konfransa 100-dən artıq ölkə və 10-dan çox beynəlxalq təşkilatdan təmsilçilər, hökumət nümayəndələri, nazirlər, vətəndaş cəmiyyəti üzvləri, nüfuzlu din xadimləri və dini liderlər qatılacaqlar.

Nümayəndə heyətinin səfəri iyulun 21-də başa çatacaq. 

Qeyd edək ki, sayca ikinci dəfə keçiriləcək konfransda Azərbaycan ilk dəfədir iştirak edir.