Anar Axundov: Azad edilmiş ərazilərə investisiya üçün minatəmizləmə prosesi həlledici əhəmiyyət daşıyır

Azərbaycanın azad edilmiş ərazilərinin minalardan təmizlənməsi investisiyaların cəlb edilməsi, sahibkarlığın inkişafı və iri infrastruktur layihələrinin həyata keçirilməsi üçün əsas yaradır.

"Report" xəbər verir ki, bunu Azərbaycanın iqtisadiyyat nazirinin müavini Anar Axundov Bakıda keçirilən 4-cü Beynəlxalq Minatəmizləmə Konfransı çərçivəsində keçirilən panel müzakirəsində bildirib.

Onun sözlərinə görə, azad edilmiş ərazilərdə investisiya mühitinin yaxşılaşdırılması, istehsalat fəaliyyətinin stimullaşdırılması və sahibkarlığın inkişafı məqsədilə əhali və biznes üçün genişmiqyaslı dəstək tədbirləri və güzəşt mexanizmləri həyata keçirilir.

A.Axundovun sözlərinə görə, əlverişli investisiya mühiti xarici kapitalın cəlb edilməsinə şərait yaradır. Türkiyə, Özbəkistan, Litva, İsveçrə, Rusiya, Pakistan və Belarusdan olan investorlar azad edilmiş ərazilərdə iqtisadiyyatın müxtəlif sektorlarında layihələr həyata keçirirlər.

O həmçinin vurğulayıb ki, minalardan təmizləmə və torpaqların təhlükəsiz şəkildə istifadəyə verilməsi yeni avtomobil və dəmir yollarının tikintisi də daxil olmaqla, infrastrukturun inkişafı üçün mühüm əhəmiyyət kəsb edir: "Azərbaycan azad edilmiş ərazilərin milli və beynəlxalq nəqliyyat şəbəkələri ilə əlaqəsini gücləndirərək, Qarabağda və Şərqi Zəngəzurda nəqliyyat infrastrukturunun inkişafı üzrə genişmiqyaslı layihələr həyata keçirir".

Nazir müavini əlavə edib ki, "Beynəlxalq sülh və rifah naminə Tramp Marşrutu" (TRIPP) layihəsinin inkişafı regionun tranzit, logistika və investisiya potensialını gücləndirərək Avropa və Asiya arasında əlaqələrin genişlənməsinə də kömək edəcək.