Yunanıstanda COVID-19 ilə bağlı saxta xəbər yayanlar məsuliyyətə cəlb olunacaq

Yunanıstan parlamenti koronavirusla bağlı saxta (feyk) xəbərlər yayanların cinayət məsuliyyətinə cəlb olunmasını nəzərdə tutan qanun layihəsini təsdiq edib.

“Report” xarici KİV-ə istinadən xəbər verir ki, yeni qanun “vətəndaşlarda narahatlıq və ya qorxu yarada bilən, cəmiyyətin ölkə iqtisadiyyatına, müdafiəsinə, ictimai səhiyyəsinə inamını sarsıdan” yalan xəbərlərə görə 3 aydan 5 ilədək həbs cəzası və pul cəriməsini nəzərdə tutur.

Bir çox media nümayəndələri və hüquqşünaslar bunu ölkədə söz və ifadə azadlığına məhdudiyyət kimi qəbul edib.

Xatırladaq ki, indiyədək ölkədə ümumiyyətlə, yalan xəbərlər yaymağa görə 10 gündən 3 ilədək həbs cəzası, yaxud pul cəriməsi nəzərdə tutulurdu.