Rusiya "Naftoqaz" obyektlərinə ballistik raketlər və PUA-larla zərbələr endirib

Rusiya qoşunları ardıcıl iki gündür Ukraynanın "Naftoqaz" şirkətinin obyektlərinə zərbələr endirir.

"Report" "RBK-Ukrayna"ya istinadən xəbər verir ki, bu barədə şirkətdən bildirilib.

Məlumata görə, son iki gündə "Naftoqaz" obyektləri pilotsuz uçuş aparatları ilə və azı dörd ballistik raket, o cümlədən kaset döyüş başlıqlı raketlərlə hücuma məruz qalıb.

İstehsalat obyektlərindən birinin əməkdaşlarını daşıyan avtobus zədələnib. Hadisə nəticəsində heç kim xəsarət almayıb.

Şirkətdən qeyd edilib ki, hücumlar nəticəsində dağıntılar olub. Hazırda dəymiş ziyanın qiymətləndirilməsi aparılır.