Reuters: Çin ABŞ infrastrukturuna kiberhücumlar ehtimalını inkişaf etdirir

Çin kibermütəxəssislərin münaqişə vəziyyətində ABŞ-ın kritik infrastrukturuna hücum etmək qabiliyyətinə sərmayə qoyur.

“Report” “Reuters”ə istinadən xəbər verir ki, bu barədə ABŞ-ın Kibertəhlükəsizlik və İnfrastruktur Təhlükəsizliyi Agentliyinin direktoru Cen İsterli bildirib.

Onun sözlərinə görə, hakerlər su təchizatı, dəmir yolu rabitəsi kimi sahələrə hücum edə bilərlər.

“Düşünürəm ki, bu, hazır olmalı olduğumuz real təhlükədir, diqqətimizi cəmləməli və ona qarşı dayanıqlılıq yaratmalıyıq. Amerikalılar çinli hakerlərin onların müdafiəsini keçə və infrastruktura zərər verə biləcəyi ehtimalına hazır olmalıdırlar. Çin dövlət xadimlərindən gələn təhlükənin geniş xarakterini, imkanlarının ölçüsünü nəzərə alsaq, bunun üçün nə qədər resurs və səy göstərdiklərini nəzərə alsaq, pozulmaların qarşısını almaq bizim üçün çox çətin olacaq”.

ABŞ və Çin arasında münasibətlər kritik dərəcədə aşağı səviyyədədir. ABŞ-ın Tayvanı müdafiə etmək niyyətini elan etməsindən və Çinin Amerika ərazisi üzərində kəşfiyyat balonları buraxmasından sonra ölkələr arasında gərginlik artmaqda davam edir.