Yuxarı
    Bağlamaq

    Pakistanın keçmiş baş naziri məhkəmədə ifadə vermək üçün ölkəsinə qayıdıb

    Nəvaz Şərif İslamabada Londonda müalicə olunan xanımı Bəyim Gülsümlə birlikdə dönüb© AP Photo / Rahmat Gul — Pakistanın keçmiş baş naziri Nəvaz Şərif

    Bakı. 2 noyabr. REPORT.AZ/ Pakistanın keçmiş baş naziri Nəvaz Şərif məhkəmədə ifadə vermək üçün ölkəsinə qayıdıb.

    “Report” “Dawn”a istinadən xəbər verir ki, o, İslamabada Londonda müalicə olunan xanımı Bəyim Gülsümlə birlikdə dönüb.

    Qeyd edək ki, Pakistan məhkəməsi antikorrupsiya işi ilə bağlı dinləmələrə gəlmədiyi üçün ötən həftə N.Şərif barəsində həbs qətimkan tədbiri seçmişdi.

    Onun vəkili Xavaca Xərris bildirmişdi ki, keçmiş baş nazir xanımı Bəyim Gülcümün xəstəliyi ilə əlaqədar məhkəmədə iştirak etmir. Bununla belə hakim qərarını dəyişməmişdi. N.Şərifin məhkəmə dinləməsində iştirak edə bilməməsi ilə bağlı götürdüyü möhlətin müddəti başa çatıb.

    Məhkəmənin növbəti iclası noyabrın 3-ə təyin edilib.

    Xatırladaq ki, oktyabrın 19-da Pakistan məhkəməsi keçmiş baş nazir N.Şərifə, onun qızı Məryəm Nəvaza və kürəkəni Məhəmməd Safdara qarşı korrupsiya ittihamı irəli sürüb. Onların heç biri özlərini təqsirli bilməyib.

    Nəvaz Şərif 3 dəfə (1990-1993, 1997-1999, 2013--2017-ci illərdə) Pakistanın baş naziri olub. Bu ilin iyulun 28-də Pakistanın Ali Məhkəməsi onun barəsində vəzifəsinə uyğun gəlməməsi ilə bağlı qərar qəbul edib. Bundan sonra N.Şərif istefa verib.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi