NYT: İsrail ABŞ-ni İranın potensial kimyəvi silah istifadəsi ilə bağlı xəbərdar edib

İsrail ABŞ-yə İranın düşmənlərinə qarşı kimyəvi silah istifadə etməyi düşündüyü barədə kəşfiyyat məlumatları ötürüb.

"Report" xəbər verir ki, bu barədə "The New York Times" qəzeti Amerika və regional rəsmilərə istinadən məlumat yayıb.

Qəzetin məlumatına görə, məlumat Vaşinqtonda birmənalı qarşılanmayıb: bəzi hökumət rəsmiləri narahatlıqlarını bildiriblər, digərləri isə məlumatların həqiqiliyinə şübhə ilə yanaşıblar və İsrailin ABŞ-ni İrana qarşı genişmiqyaslı hərbi əməliyyatı bərpa etməyə inandırmağa çalışdığı versiyasını irəli sürüblər.

NYT qeyd edib ki, İsrail son iki həftə ərzində ABŞ-yə İranın raketləri kimyəvi başlıqlarla təchiz etmək üçün texnologiyanı sürətlə inkişaf etdirdiyinə və ya gizli şəkildə onları İsrailə və ya başqa bir ölkəyə sonrakı hücumlar üçün daşımağı planlaşdırdığına əminlik verib.

Bununla belə, İsrail iddiaları üçün dəlil təqdim etməyib və xəbərdarlığını kəşfiyyat qiymətləndirmələri ilə yekunlaşdırıb. Bu xəbərdarlıqlar Fars körfəzi dövlətlərində də şübhə ilə qarşılanıb.

İran daha əvvəl 1980-1988-ci illərdə İraqla müharibə zamanı kimyəvi silahlar hazırladığını etiraf edib, lakin sonradan onları məhv etdiyini bildirib.

Ağ Ev və MKİ şərh verməkdən imtina edib. İsrail hərbçiləri də xəbərlərə şərh verməkdən boyun qaçırıb. İsrail Daxili Cəbhə Komandanlığı təlimlər keçirsə də, onların proqramına mümkün kimyəvi hücuma hazırlıq daxil deyil.