Nigeriyada silahlı qruplaşmanın hücumu nəticəsində 10 nəfər öldürülüb

Bakı. 14 iyun. REPORT.AZ/ Nigeriyanın şimal-qərbində silahlı qruplaşmanın hücumu zamanı 10 nəfər öldürülüb.

"Report" xəbər verir ki, bu barədə "Anadolu" agentliyi məlumat yayıb.

Zamfara vilayətinin polis rəsmisi Məhəmməd Şehu bildirib ki, Birnin-Magaji bölgəsinə silahlı qruplaşmanın hücumu nəticəsində habelə xeyli insan yaralanıb. Yaralılar xəstəxanaya yerləşdirilib.

Hadisə ilə bağlı təhqiqat başlayıb. Bu bölgədə maldarlarla əkinçilər arasında şiddətli qarşıdurmalar baş verir. Zamfara vilayətində 2 həftə əvvəl baş verən qarşıdurmada 26 nəfər öldürülüb.