NATO Əfqanıstana əlavə hərbçi göndərəcək

Bakı. 29 iyun. REPORT.AZ/ NATO-ya üzv olan 15 ölkə Əfqanıstana əlavə qoşun göndərəcəyini bildirib.

“Report” TASS-a istinadən xəbər verir ki, bunu NATO-nun baş katibi Yens Stoltenberq söyləyib.

“NATO-nun Əfqanıstanda mövcudluğunu və mövqeyini gücləndirdiyini təsdiqləyə bilərəm. 15 ölkə artıq Əfqanıstana əlavə hərbçi göndərəcəyini bildirib. Mən onların daha çox olacağını gözləyirəm. Söhbət onların yenidən döyüş əməliyyatlarına qayıdacağından getmir. Bu, NATO-nun yerli milli qüvvələri hazırlaması üzrə həmkarlığını nümayiş etdirməsidir. Əsas məsələ Əfqanıstan xüsusi təyinatlı qüvvələri və aviasiyasının hazırlığının güclənməsidir. NATO-nun Əfqanıstandakı əməliyyat komandanlığı 4 min əlavə hərbçi göndərilməsini istəyib”, - Yens Stoltenberq vurğulayıb.

Qeyd edək ki, NATO 2014-cü ildə Əfqanıstandan hərbçilərini çıxarması işini başa çatdırıb. Hazırda “Qətiyyətli dəstək” proqramı çərçivəsində alyansın bu ölkədə 13,5 min hərbçisi fəaliyyət göstərir. Onlar Əfqanıstan hərbçiləri və təhlükəsizlik qüvvələrini təlimatlandırırlar. NATO Əfqanıstan ordusuna hər il 5 milyard dollara yaxın maliyyə dəstəyi verir. 

Xatırladaq ki, iyunun 29-da Belçikanın Brüssel şəhərində Əfqanıstan İslam Respublikasında həyata keçirilən NATO-nun "Qətiyyətli Dəstək" missiyasına töhfə verən dövlətlərin müdafiə nazirləri səviyyəsində görüş keçiriləcək. Həmin tədbirdə Azərbaycan müdafiə naziri, general-polkovnik Zakir Həsənov da iştirak edəcək.