Modi Baydenlə Ukrayna və Banqladeşdəki vəziyyəti müzakirə edib

Hindistanın Baş naziri Narendra Modi ABŞ Prezidenti Cozef Baydenlə telefonla danışıb.

"Report" xəbər verir ki, bu barədə Hindistanın Baş naziri "X" sosial şəbəkəsində yazıb.

O qeyd edib ki, söhbət zamanı müxtəlif regional və qlobal məsələlər, o cümlədən Ukraynadakı vəziyyətlə bağlı ətraflı fikir mübadiləsi aparılıb.

"Biz Banqladeşdəki vəziyyəti də müzakirə etdik və orada hindular üçün normal yaşayış və təhlükəsizliyin tezliklə bərpa edilməsinin vacibliyini vurğuladıq", - Modi vurğulayıb.

Modi söhbət zamanı Hindistanın sülh və sabitliyin tezliklə bərpasına tam dəstəyini bir daha ifadə edib.