MKİ rəhbəri Camal Qaşıqçının qətlinin araşdırılması üçün Türkiyəyə gedəcək

Bakı. 23 oktyabr. REPORT.AZ/ ABŞ-ın Mərkəzi Kəşfiyyat İdarəsinin (MKİ) direktoru Cina Haspel jurnalist Camal Qaşıqçının Səudiyyə Ərəbistanının İstanbuldakı Baş Konsulluğunda qətlinin araşdırılması üçün Türkiyəyə səfər edəcək.

Bu barədə "Report" "İzvestiya.ru"ya istinadən xəbər verir.

Qeyd edilir ki, mənbələr MKİ rəhbərinin Amerika KİV-i ilə əməkdaşlıq etmiş jurnalistin müəmmalı şəkildə həlak olmasının araşdırılmasına cəlb edilməsi haqqında bildirib.

ABŞ prezidenti Donald Tramp Qaşıqçının ölümü ilə bağlı araşdırmanın nəticələrindən razı deyil. Lakin prezident Səudiyyə Ərəbistanına qarşı sanksiyalarla bağlı təklifləri də rədd edib.

ABŞ Konqresinin Senatı Cina Haspeli mayda Mərkəzi Kəşfiyyat İdarəsinin (MKİ) direktoru vəzifəsinə təsdiq edib. O, 1998-ci ildə Mərkəzi Kəşfiyyat İdarəsinin Bakı rezidenturasını rəhbərinin müavini işləyib. Eyni zamanda 2000-ci ildə MKİ-nin Ankaradakı rezidenturası rəhbərinin müavini olub.