Malidə yaraqlılar üç ayda bir kəndin 100-ə yaxın sakinini öldürüblər

Malidə terrorçular ölkənin mərkəzi hissəsindəki Mopti bölgəsində yerləşən Bankasse bölgəsindəki kəndə hücum edərək 26 dinc sakini öldürüb.

“Report” xəbər verir ki, bu barədə “Reuters” yerli hakimiyyət orqanlarına istinadən məlumat yayıb.

Qeyd olunub ki, silahlı yaraqlılar kəndlilərə tarlalarda işləyərkən hücum ediblər. Silahlıların hücumu xəbərindən sonra hökumət ordusunun bölmələri kəndə gəlib.

Terrorçular eyni kəndə iyulun əvvəlində hücum edərək 40-a yaxın, mayın sonunda isə 20-dən çox dinc sakini qətlə yetiriblər.

Mali hakimiyyəti ilə ekstremist və separatçı qruplar arasında silahlı münaqişə 2012-ci ildə başlayıb. O vaxtdan bəri ölkədə təhlükəsizlik və sosial-iqtisadi inkişaf sahəsində böhranlı vəziyyət hökm sürür.