İsrail ordusu: "Hizbullah"ın silah sexinə və hərbi qərargahına zərbələr endirilib

İsrail Ordusunun Hərbi Hava Qüvvələri "Hizbullah" radikal hərəkatının Livanın cənubundakı silah sexinə, hərbi qərargahına və bir neçə qurğusuna zərbələr endirib.

“Report”un xəbərinə görə, bu barədə İsrail ordusunun mətbuat xidməti məlumat verib.

Hücumlar Livanın cənubundakı Cuaya, Nabait, Mansuri, Kfar-Kila yaşayış məntəqələrinə həyata keçirilib.

Bundan əlavə, İsrail hərbçiləri Livan ərazisinin cənub hissəsindəki Hula bölgəsindəki "terror dəstəsinə" zərbə endiriblər.

Xatırladaq ki, 2023-cü il oktyabrın 7-də Fələstinin HƏMAS hərəkatı yaraqlılarının Qəzza zolağından İsrail ərazisinə soxulmasından, 200-dən çox mülki insanı girov götürməsindən sonra Yaxın Şərqdə vəziyyət kəskin pisləşib.