​İran və "altılıq" Vyanada danışıqların növbəti mərhələsinə başlayır

Bakı. 10 İyun. REPORT.AZ/ Bu gün Vyanada İran və "altılıq" ölkələrinin (BMT Təhlükəsizlik Şurasının beş daimi üzvü və Almaniya) nümayəndə heyətləri yekun sazişin son hazırlanma tarixinə üç həftə qalmış İslam Respublikasının nüvə proqramı üzrə danışıqların növbəti mərhələsinə başlayacaqlar.

"Report" xəbər verir ki, bununla yanaşı tərəflərin bir sıra məsələlər - ekspertlərin İran ərazisindəki obyektlərə girişi, sanksiyaların mümkün bərpa olunma mexanizmi və ekspert nəzarətinin reallaşdırılması üzrə prinsipial fikir ayrılıqları qalmaqdadır.

Bu gün Avstriyanın paytaxtında ekspertlərin işə başlayacağı planlaşdırılır. Onların səylərini Avropa Xarici Siyasət Xidmətinin baş katibinin siyasi məsələlər üzrə müavini Heyqa Şmid və İranın xarici işlər nazirinin müavini Abbas Araqçi əlaqələndirəcək.

Siyasi direktorlar səviyyəsində tamformatlı görüş iyunun 12-də keçiriləcək.