Burkino-Fasoda silahlıların hücumu zamanı onlarla insan öldürülüb

Burkino-Fasonun şimalında silahlıların hücum nəticəsində 20 nəfər ölüb.

“Report”un xəbərinə görə, bu barədə yerli mətbuat məlumat yayıb.

Məlumata görə, naməlum silahlılar ölkənin Sahel bölgəsindəki Kaonqo və Tondobi kəndlərinə hücum ediblər.

Hücum zamanı 20 nəfər həyatını itirib. Hadisəyə görə məsuliyyəti heç bir qruplaşma üzərinə götürməyib.

Qeyd edək ki, qonşu Malinin “Əl-Qaida” və İŞİD-ə bağlı terror qruplaşmaları 2015-ci ildən Burkino-Fasonun şimalında və şərqində tez-tez hücumlar təşkil edir.

Rəsmi məlumata görə, 2015-ci ildən 2021-ci ilin dekabrına qədərki hücumlarda təhlükəsizlik qüvvələrinin 600 əməkdaşı da daxil olmaqla, 2 000 insan həyatını itirib, daha 2 milyon sakin evlərini tərk edib.