Bayden ABŞ-da zənginlərə yeni vergi tətbiq etmək istəyir

ABŞ Prezidenti Cozef Bayden ümumi aktivləri 100 milyon dollardan çox olan Amerika ev təsərrüfatları üçün minimum 20% gəlir vergisi təklif etməyi planlaşdırır.

“Report” TASS-a istinadən xəbər verir ki, bu barədə şənbə günü CNBC telekanalı əlinə keçən sənədə istinadən məlumat yayıb.

Sənəddə deyilir ki, bu addımın yaxın 10 ildə xəzinəyə təxminən 360 milyard ABŞ dolları gəlir gətirəcəyi gözlənilir. Telekanal qeyd edir ki, bu məbləğin yarıdan çoxunu sərvəti 1 milyard ABŞ dollarından çox olanlardan yığılan vergilərdən əldə etmək olar.

CNBC-nin məlumatına görə, Bayden təklifini martın 28-də təqdim edəcək.