Müharibə dövründə əhalinin 81,6 %-i İlham Əliyevdə yeni keyfiyyətlər müşahidə edib

Sosial Tədqiqatlar Mərkəzi (STM) Vətən müharibəsindən sonra Prezident İlham Əliyevin siyasi lider kimi şəxsi keyfiyyətlərinə vətəndaşların münasibətini öyrənmək üçün rəy sorğu keçirib.

“Report” xəbər verir ki, sorğunun nəticələrini dekabrın 24-də keçirdiyi mətbuat konfransında mərkəzin İdarə Heyətinin sədri, deputat Zahid Oruc açıqlayıb.

44 gün davam edən II Qarabağ müharibəsi dövründə əhalinin mütləq əksəriyyəti (81,6 %) Prezidentdə yeni şəxsi keyfiyyətlər müşahidə edib.

Prezidentdə yeni şəxsi keyfiyyətlər müşahidə etdiyini deyənlərin 87,3 %-nin Prezidentə etibarı artıb.

Təxminən hər 5 nəfərdən birində Prezident barədə hər hansısa fikir dəyişikliyi müşahidə edilməyib. Bununla yanaşı, fikirlərində heç bir dəyişiklik olmadığını (18,2 %) deyənlərin 74,8 %-nin Prezidentə etibarı artıb.

81,6 % respondentin nəzərində əsasən iki dəyişiklik önə çıxır. Belə ki, təxminən 70,0 % respondent müharibə nəticəsində Prezidenti xalqa yaxın və xalqın fikrini dəyərləndirən insan kimi tanıdığını bildirib. 67,3 % isə Prezidentin timsalında Heydər Əliyev kimi milli lider nümunəsini gördüyünü bildirib.

Respondentlərin 29,8 %-i Ali Baş Komandanın Vətən müharibəsindəki xidmətlərinin xüsusi adla qiymətləndirilməsinin tərəfdarı olduğunu bildirib. Sorğuda iştirak edənlərin 1/3-nin bu mövqedən çıxış etməsi onu göstərir ki, ictimaiyyət arasında məhz Ali Baş Komandan üçün xüsusi adın təsis olunmasının tərəfdarları çoxdur.

Rəyi soruşulanların 27,9 %-i Ali Baş Komandanın Vətən müharibəsindəki xidmətlərinin yüksək qiymətləndirilməsini istədiklərini bildiriblər. Lakin bu respondentlər qiymətləndirilmənin necə edilməsi ilə bağlı konkret təklif bildirməyiblər.