Hüquqşünas Gürcüstanda yaşayan azərbaycanlıları gürcü dilini öyrənməyə çağırıb

"Azərbaycan dövlətinin burada bir çox mərkəzləri var. Burada həmvətənlilərimiz üçün ödənişsiz olaraq kurslar açılıb. Gürcü, Azərbaycan, ingilis dilləri tədris olunur. Bunların hamısı ödənişsiz olaraq edilir".

"Report"un Gürcüstan bürosu xəbər verir ki, bu fikirləri Gürcüstanda "Qanun" Hüquqi Yardım Mərkəzinin baş direktoru Əli Bədirov sentyabrın 2-də Tbilisidə keçirilən Beynəlxalq Gənclər Forumunun "Mədəni diplomatiya" adlı panel müzakirələrində deyib.

O vurğulayıb ki, Gürcüstanda yaşayan hər bir azərbaycanlı Azərbaycan dövlətinin diqqətini hiss edir.

Hüquqşünas bildirib ki, azərbaycanlılar və digər etnik qruplar üçün Gürcüstanda 1+4 təhsil proqramı var ki, bu proqrama görə azərbaycanlılar sadəcə 1 imtahan verməklə ali təhsil müəssisələrinə qəbul olurlar: "Sadəcə 1 il gürcü dili öyrənib universitetdə təhsillərini davam etdirirlər. Yaxşı təhsil alanlara isə Azərbaycan Respublikası Dövlət Neft Şirkəti tərəfindən təqaüdlər verilir".

Vəkil söyləyib ki, Gürcüstanda yaşayan azərbaycanlı gənclər universitetləri bitirməklərinə baxmayaraq gürcü dilində danışa bilmirlər: "Bu səbəbdən də yüksək vəzifə tutmaqdan kənarda qalırlar. Bir çox azərbaycanlı isə kompakt şəkildə yaşadığı üçün bəzi yerlərdə heç gürcü dilində bir söz belə bilmirlər. Bu da onların cəmiyyətə inteqrasiyasına mane olur. Buna görə də, maksimum çalışmaq lazımdır ki, burada yaşayan azərbaycanlılar yaşadıqları ölkənin rəsmi dilini çox yaxşı öyrənsinlər".

Ə.Bədirov azərbaycanlıların 1+4 proqramına əlavə olaraq gürcü dilindən imtahan vermələrini təklif edir.

Xanlar Mehdiyev