Xaçmazda Qadın Resurs Mərkəzinin açılışı olub 

Xaçmazda Qadın Resurs Mərkəzi açılıb.

"Report"un Şimal bürosunun melumatına gorə, Ailə, Qadın və Uşaq Problemləri üzrə Dövlət Komitəsi (AQUPDK), BMT-nin İnkişaf Proqramı (BMTİP), və ABŞ Beynəlxalq İnkişaf Agentliyi (USAID) Xaçmaz Qadın Resurs Mərkəzinin (QRM) açılışını ediblər.

Açılış tədbirində AQUPDK-nın sədr müavini Sədaqət Qəhrəmanova, ABŞ Beynəlxalq İnkişaf Agentliyinin (USAID) missiya direktoru Cey Sinqx, BMTİP-nin Azərbaycandakı nümayəndəliyinin proqram rəhbəri Leyla Fəthi və Xaçmaz Rayon İcra Hakimiyyəti başçısının müavini Günel Nurəddinova iştirak ediblər.

Tədbirdə giriş sözü ilə çıxış edən AQUPDK-nın sədr muavini Sədaqət Qəhrəmanova bildirib ki, layihənin davamlılığı üçün əlimizdən gələni edəcəyik: "Ailə, Qadın və Uşaq Problemləri üzrə Dövlət Komitəsinin BMT-nin İnkişaf Proqramı və USAID-lə birgə həyata keçirdiyi layihə çərçivəsində yaradılmış Xaçmaz Qadın Resurs Mərkəzi qadınların biznes fəaliyyətlərinin, onların bu istiqamətdə bilik və bacarıqlarının artırılmasına kömək edir. Həmçinin, burada həssas təbəqədən olan qadınlara hüquqi və psixoloji dəstək göstərilir. Bu layihənin davamlılığı üçün səylərimizi bundan sonra da davam etdirəcəyik”.

Daha sonra çıxış edən USAID-in missiya direktoru Caidev Sinqxin vurğulayıb ki, layihə çərçivəsində görəcəyimiz işlərlə qadınlara dəstək olmaqdan qürur duyuruq: "USAID Azərbaycan qadınlarına Qadın Resurs Mərkəzində iştirak edə biləcəkləri təlim vasitəsilə kritik bacarıqları öyrənmək və iqtisadi cəhətdən daha möhkəm olmaq səylərində dəstək olmaqdan qürur duyuruq. BMTİP və AQUPDK-dakı tərəfdaşlarımız sayəsində biz həm də məişət zorakılığı qurbanlarının lazımi yardım axtarmaq üçün təhlükəsiz yerə malik olduqlarını bilməkdən çox rahatiq".

Daha sonra çıxıs edən BMTİP-nin Azərbaycandakı nümayəndəliyinin proqram rəhbəri Leyla Fəthi qeyd edib ki, qadınlar bütün sahələrdə uğurlu ola biləcəklərini dəfələrlə nümayiş etdiriblər: "Bunun üçün bərabər şərtlər yaratmaq kifayətdir. Qurulmasını dəstəklədiyimiz Qadın Resurs Mərkəzlərinin məqsədi də qadınlara Azərbaycan qanunvericiliyinin verdiyi bərabər şərtlərdən faydalanmağa yol göstərmək, vasitəçi olmaqdır".

Məlumat üçün onu da qeyd edək ki, Xaçmazda yerləşən Mərkəz BMTİP-nin Ailə, Qadın və Uşaq Problemləri üzrə Dövlət Komitəsi ilə birgə icra etdiyi və USAID-in maliyyələşdirdiyi “Sahibkarlığa və Məşğulluğa İqtisadi Dəstək” layihəsi çərçivəsində istifadəyə verilmiş növbəti Qadın Resurs Mərkəzidir.

Xaçmaz Qadın Resurs Mərkəzi ilkin fəaliyyətlərinə 2020-ci ildə başlayıb. Mərkəzin rəsmi açılışı qlobal pandemiya səbəbindən həmin il mümkün olmayıb.

Fəaliyyətə başladığı gündən bəri Mərkəz 23 qadına öz biznesini qurmaqda dəstək olub, o cümlədən, 104 qadın üçün biznesin inkişafı, maliyyə savadlılığı, SMM kimi mövzularda təlimlər təşkil edib.

Mərkəzin 280-dən çox üzvü var. Bu günə qədər Xaçmaz QRM faəliyyətləri çərçivəsində gender əsaslı zorakılıq (GƏZ) qurbanlarından 70 nəfəri psixoloji dəstək alıb, 30 nəfərinə isə hüquqi xidmət təqdim olunub.

2022-ci ilin sonuna kimi 15 qadın sahibkara öz biznesini qurmalarında dəstək göstəriləcək, habelə 40 qadın üçün peşə təlimləri təşkil ediləcək və 100 GƏZ qurbanına hüquqi və psixoloji dəstək təmin olunacaq.