Ukraynalı deputat: Azərbaycanın rolunu tezliklə qlobal sabitliyin güclənməsində də görəcəyik

Heydər Əliyevin əsasını qoyduğu prinsiplər əsasında Azərbaycanın rolunu tezliklə qlobal sabitliyin güclənməsində də görəcəyik.

Bunu "Report"un Şərqi Avropa bürosuna açıqlamasında Ukrayna Ali Radasında Hakim Xalqın Xidmətçisi Partiyasından olan deputat Yuri Kamelçuk bildirib.

O qeyd edib ki, Heydər Əliyev birmənalı olaraq postsovet məkanında və müasir ölkələrdə gedən geosiyasi proseslərdə çox mühüm rol oynayıb.

"O, Azərbaycana münasibətdə müxtəlif dövlətlərin istəklərinin və strategiyalarının dərinliyini bilərək öz ölkəsini birmənalı şəkildə gücləndirdi. Onun təhlükəsizliyini gücləndirdi. Hansı ki, bir çox ölkələr bu təcrübəni özünə şamil edir. Əslində, Azərbaycanın son vaxtlar əldə etdiyi nailiyyətlər Heydər Əliyevin əsasını qoyduğu işlərin nəticələrinin bir nümunəsidir", - deyə deputat vurğulayıb.

Y.Kamelçuk əlavə edib ki, məhz Heydər Əliyevin əsasını qoyduğu prinsiplərlə Azərbaycan regionu öz sabitliyi ətrafında birləşdirməkdədir:

"Bu sabitlik fonunda Azərbaycan indiki prezidentinin rəhbərliyi ilə böyüməkdə və iqtisadi cəhətdən dünyanın diqqət mərkəzi olmaqda davam edir. Görünən odur ki, ölkə bundan sonra da inkişaf edəcək. Əminəm ki, biz gələcəkdə Azərbaycanın geosiyasi proseslərdə güclü rolunu təkcə postsovet məkanında deyil, bütün qitələrdə sülh və iqtisadi sabitliyin möhkəmlənməsində də görəcəyik".