Pakistanın "National Herald Tribune" qəzetində Xocalı soyqırımı ilə bağlı məqalə dərc edilib

Bakı. 18 fevral. REPORT.AZ/ Pakistanın “National Herald Tribune” qəzetində və elektron portalında Xocalı soyqırımı ilə bağlı məqalə dərc edilib.

Azərbaycan Respublikasının Pakistandakı Səfirliyindən "Report"a verilən məlumata görə, “Azərbaycanlıların Xocalı soyqırımı üçün ədalət” sərlövhəli məqalədə Ermənistan tərəfindən bir gecədə 613 Azərbaycan vətəndaşının, ö cümlədən 106 qadın, 70 yaşlı və 83 uşağın xüsusi qəddarlıqla qətlə yetirildiyi Xocalı Soyqırımının Ermənistanın işğalçılıq və etnik təmizləmə siyasətinin tərkib hissəsi olduğu ətraflı izah edilir.

Məqalədə həmçinin mühüm strateji mövqeyə malik və Azərbaycanın qədim tarixinin önəmli ünsürlərini ehtiva edən Xocalının məhv edilməsinin də eyni məqsədə xidmət etdiyi bildirilir.

Yazıda Xocalı soyqırımının siyasi, tarixi və hüquqi mahiyyəti vurğulanaraq, qurbanların məhz azərbaycanlı olduqlarına görə və heç bir fərq qoyulmadan qətlə yetirildiyi Xocalıdakı vəhşətin beynəlxalq normalar baxımından aşkar soyqırım xarakteri daşıdığı diqqətə çatdırılır. Dünyanın böyük nəşrlərinin o dövrə aid xəbərlərində soyqırımın dəhşətinin dolğun əks etdirildiyi, ermənilərin hadisəni təkzib etməsinin heç cür mümkün olmadığı qeyd olunub.

Müəllif yazıda Xocalı soyqırımı ilə əlaqədar İslamabad Strateji Tədqiqatlar İnstitutuna keçiriləcək seminar barədə də məlumat verərək, “Xocalıya Ədalət” məsələsinin BMT və insan haqlarını qoruduqlarını iddia edən böyük dövlətlər üçün hələ də böyük sual olduğunu diqqətə çatdırıb.