Meksika səfiri Azərbaycan Konstitusiya Məhkəməsinin sədri ilə görüşüb

Bakı. 28 oktyabr. REPORT.AZ/ Meksikanın Azərbaycandakı səfiri Rodriqo Labardini əməkdaşlıq əlaqələrini inkişaf etdirmək məqsədilə Azərbaycanın Konstitusiya Məhkəməsinin sədri Fərhad Abdullayevlə görüş keçirib.

Bu barədə "Report"a Meksikanın Azərbaycandakı səfirliyindən bildirilib.

İlk növbədə R.Labardiniyə 1885-ci ildə inşa olunmuş qədim tarixə malik məhkəmə binası haqqında məlumat verilib.

Konstitusiya Məhkəməsinin sədri ilə keçirilən görüş zamanı Meksika-Azərbaycan ikitərəfli münasibətlər, milli mədəniyyət, ədəbiyyat və mətbəxlərdə mövcud oxşarlıqlar və, xüsusilə, hər iki ölkə xalqlarının rifahının axtarışında adıçəkilən dövlətlərin bölüşdüyü hüquqi mədəniyyətdən söz açılıb.

F.Abdullayev öz növbəsində Konstitusiya Məhkəməsinin tarixi, fəaliyyəti və digər dövlətlərin konstitusiya orqanları ilə əməkdaşlıqdan danışıb. Tərəflər ölkələrində həyata keçirilmiş konstitusiya islahatları haqqında söhbət açıblar.

Görüşün sonunda tərəflər hüquqi sahədə ikitərəfli əməkdaşlığın gücləndirilməsinə dair istəklərini bildiriblər.