İran XİN rəhbəri: "Biz Xəzəri dostluq dənizinə çevirmək üçün addım atırıq"

Moskva. 28 aprel. REPORT.AZ/ "Biz arzu edirik ki, qonşularımız sülh və əmin-amanlıq şəraitində yaşasın."

"Report"un Rusiya bürosunun məlumatına görə, bu barədə Moskvada İranın XİN rəhbəri Məhəmməd Cavad Zərif bildirib.

Onun sözlərinə görə, İran Rusiya və digər Xəzəryanı ölkələrlə əməkdaşlığı davam etdirəcək.

"Xəzəri dostluq dənizinə çevirmək üçün addım atırıq", - nazir deyib.

İranlı diplomat qeyd edib ki, İran və Rusiya arasında əlaqələr son illər əvvəlkindən daha sürətlə inkişaf edir.

Onun sözlərinə görə, həmçinin İŞİD-in məğlub edilməsi Rusiya ilə İranın əməkdaşlığı sayəsində mümkün olub.

Rusiya XİN başçısı Sergey Lavrov isə İranın nüvə proqramı ətrafında yaranmış vəziyyətlə bağlı narahatlığını dilə gətirib.