Gürcü politoloqlar: "Zəfər Günündə gürcü xalqı Azərbaycan xalqı ilə həmrəyliyini nümayiş etdirir"

"Azərbaycanda olduğu kimi, Gürcüstanda da Zəfər Günü tədbirləri keçirilir. Gürcü xalqı Azərbaycan xalqı ilə həmrəyliyini göstərir".

Bunu "Report"un yerli bürosuna açıqlamasında gürcü politoloq Vaso Kopanadze bildirib.

O söyləyib ki, BMT-nin uzun illər ərzində yalnız kağız üzərində olan 4 qətnaməsini Azərbaycan Prezidenti, Ali Baş Komandan İlham Əliyevin rəhbərliyi ilə Azərbaycan Ordusu və xalqı yerinə yetirdi.

"Cəmi 44 gün ərzində Azərbaycan öz ərazilərini erməni işğalından qurtarmaqla suveren və konstitusion hüquqlarını bərpa edə bildi", - o vurğulayıb.

Politoloq Zəfər Günü ilə bağlı Azərbaycan xalqını təbrik edib.

Gürcüstanın "Art Gallery" televiziya şirkətinin qurucusu Tengiz Txilava da Zəfər Günü ilə bağlı səmimi təbriklərini çatdırıb:

"44 günlük Vətən müharibəsi ilə Azərbaycan öz ərazi bütövlüyünü bərpa edə bildi. Postsovet ölkələri arasında Azərbaycan bununla bağlı ilkə imza atıb".