Gi Bonven: İsveçrə dağlıq regionların inkişafı təcrübəsini Azərbaycanla bölüşməyə hazırdır

İsveçrə dağlıq regionların inkişafı və belə ərazilər üçün dayanıqlı iqtisadi modellərin yaradılması təcrübəsini Azərbaycanla bölüşməyə hazırdır.

Bunu İsveçrənin Azərbaycandakı səfirliyinin nümayəndəsi və əməkdaşlıq proqramlarının rəhbər müavini Gi Bonven Bakıda keçirilən WUF13 çərçivəsində "Report"a müsahibəsində bildirib.

"Azərbaycan kimi, İsveçrə də dağlıq ölkədir, buna görə də xüsusilə dağlıq regionların yerli iqtisadi inkişafı sahəsində bölüşə biləcəyimiz təcrübə var", - o deyib.

Bonvenin sözlərinə görə, İsveçrə tərəfi artıq Azərbaycan Şəhərsalma Kampaniyası çərçivəsində müzakirələrdə iştirak edib, burada şəhərlərin inkişafı və onların ətrafında iqtisadi mərkəzlərin formalaşdırılması məsələləri nəzərdən keçirilib.

"İnkişafın təkcə şəhərlərə deyil, həm də dağlıq regionlara fayda gətirməsi vacibdir. Söhbət infrastrukturla yanaşı, həm də bütövlükdə iqtisadi inkişafdan gedir", - diplomat qeyd edib.

WUF13-ə toxunan Bonven forumun təcrübə mübadiləsi üçün beynəlxalq platforma kimi əhəmiyyətini vurğulayıb.

"Forumdan əsas gözlənti şəhərlər və icmalar arasında bilik mübadiləsi, şəhərlərin dayanıqlığı, iqlim dəyişikliyinə uyğunlaşma və şəhər planlaşdırmasına yeni yanaşmaların müzakirəsidir", - o əlavə edib.