Yuxarı

Dərbənddə Heydər Əliyev Fondunun dəstəyi ilə yenidən qurulan məktəbin açılışı olub

“Dost Azərbaycan Respublikası kimi qonşuların olması çox vacibdir”

Bakı. 8 oktyabr. REPORT.AZ/ Dərbənddə Sovet İttifaqı Qəhrəmanı Şəmsulla Əliyevin adını daşıyan 4 saylı orta ümumtəhsil məktəbinin Heydər Əliyev Fondunun dəstəyi ilə yenidənqurmadan sonra açılışı olub.

"Report"un xəbərinə görə, tədbirə toplaşanlar qarşısında çıxış edən məktəbin direktoru Gülnaz Səmədova görülmüş işlər barədə məlumat verib, məktəbin bütün pedaqoji kollektivi, şagirdlər və onların valideynləri adından şəhərin 2000 illik yubileyi münasibətilə bu məktəbin “ikinci dəfə doğuluşuna görə” Heydər Əliyev Fondunun prezidenti, Azərbaycanın birinci xanımı Mehriban Əliyevaya və Fondun Rusiyadakı nümayəndəliyinin rəhbəri Leyla Əliyevaya təşəkkür edib. Bu əlamətdar hadisə münasibətilə məktəb binasının əsas divarına xatirə lövhəsi vurulub.

Açılış mərasimində Dağıstanın təhsil və elm naziri Şahabbas Şahov iştirak edib. Nazir öz çıxışında təşəkkür sözlərinə şərik olduğunu bildirərək deyib: “Dost Azərbaycan Respublikası kimi qonşuların olması çox vacibdir”.

Məktəbin şagirdləri açılış mərasimi münasibətilə mahnı və rəqslərdən ibarət maraqlı tamaşa hazırlayıblar. Sonra qonaqları məktəb ərazisinə baxmağa dəvət edərək onları bu təhsil müəssisəsinin yeni maddi-texniki bazası ilə tanış ediblər.

1926-cı ildə tikilmiş 4 saylı məktəb əvvəlcə “Yeddiillik fabrik-zavod məktəbi” adlanırdı. Bu gün həmin məktəb onun məzunu olmuş Sovet İttifaqı Qəhrəmanı Şəmsulla Əliyevin adını daşıyır. Gələn il bu təhsil müəssisəsinin yaradılmasının 90 illik yubileyi qeyd ediləcək. Təmirdən sonra burada iki növbədə 700-dən çox şagird təhsil alacaq.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi