Britaniya Azərbaycan və Ermənistanda minaların təmizlənməsinə yarım milyon funt-sterlinq ayırıb

Böyük Britaniya hökuməti bu gün Ermənistan və Azərbaycanda minaların təmizlənməsini dəstəkləmək üçün Birləşmiş Millətlər Təşkilatının İnkişaf Proqramına (UNDP) əlavə 500 min funt-sterlinq ayırıb.

"Report"un xəbərinə görə, ən son ayrılan vəsait ərazi təhlükəsizliyini təmin etmək, xəsarətlərin qarşısını almaq və insanların həyatını xilas etmək üçün mühüm təlim və mütəxəssis məsləhətlərinin təmin edilməsinə imkan yaradacaq.

Avropa və Şimali Amerika üzrə nazir Ceyms Kleverli deyib ki, Böyük Britaniyanın bu maliyyə dəstəyi BMT-nin təcrübəsindən istifadə edəcək, həm Ermənistanda, həm də Azərbaycanda mülki həyat üçün riskləri azaldacaq və insanlara öz həyatlarını yenidən qurmağa imkan verəcək:

"Regiondakı bütün xalqları qorumaq naminə, Böyük Britaniya Ermənistan və Azərbaycanı piyadalar əleyhinə minalar və kasetli silahların istifadəsinin aradan qaldırılmasına yönəlmiş BMT konvensiyalarını imzalamağa çağırır. Biz səlahiyyətli şəxsləri BMT və digər humanitar təşkilatların regionun bütün yerlərində sülh və inkişafın dəstəklənməsinə maksimum dərəcədə töhfə verə bilmələrini təmin etməyə çağırmaqda davam edirik”.

Dünyada mina və partlamamış hərbi sursatlarla ən çox çirklənmiş ərazilərdən biri olan bu regionun minalardan təmizlənməsinə Böyük Britaniyanın verdiyi dəstək 1 milyon funt-sterlinqi ötüb.

Qeyd edək ki, region dünyada mina və partlamamış hərbi sursatlarla ən çox çirklənmiş bölgələrdən biridir.