Azərbaycan-Qazaxıstan Ekspertlər Şurası yaradılıb

Bakıda keçirilən Azərbaycan və Qazaxıstan arasında diplomatik münasibətlərin qurulmasının 30 illiyinə həsr olunmuş "dəyirmi masa" çərçivəsində Azərbaycan-Qazaxıstan Ekspertlər Şurasının yaradılması haqqında memorandum imzalanıb.

“Report” xəbər verir ki, sənədi Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev və Qazaxıstan Prezidenti yanında Qazaxıstan Strateji Araşdırmalar İnstitutunun direktoru Yerkin Tukumov imzalayıblar.

F.Şəfiyev deyib ki, Şuranın yaradılmasında məqsəd iki ölkə ekspertləri arasında əməkdaşlığı möhkəmləndirməkdir. 

“Bu gün təsis edilmiş Eksertlər Şurası Qazaxıstan və Azərbaycan arasında münasibətlərin möhkəmləndirilməsinə daha bir töhfədir. Qafqazda dayanıqlı sülhün bərqərar olması üçün rəsmi Bakının səylərini yüksək qiymətləndiririk”, - Y.Tukumov bildirib.