Yuxarı

Azərbaycanda ünvanlı sosial yardım almaq istəyənlərin sayı azalıb

Əmək və Əhalinin Sosial Müdafiəsi Nazirliyinin 142-Çağrı mərkəzi bu ilin 9 ayı ərzində 78940 müraciəti cavablandırıb

Bakı. 6 oktyabr. REPORT.AZ/ Ötən ay Əmək və Əhalinin Sosial Müdafiəsi Nazirliyinin 142-"Çağrı mərkəzi"nə ümumilikdə 9567 müraciət daxil olub. Bu barədə "Report"a nazirliyin İctimaiyyətlə əlaqələr şöbəsindən məlumat verilib.

Məlumata görə, müraciətlərin 3517-si (36,7%) sosial təminat, 2266-sı (23,7%) əmək qanunvericiliyi, 2016-sı (21,1%) nazirliyin elektron xidmətlərindən istifadə, 1058-i (11,1%) tibbi-sosial ekspertiza və əlilliyi olan şəxslərin reabilitasiyası və 710-u (7,4%) məşğulluq məsələlərini əhatə edib. "Çağrı mərkəzi"nə daxil olan müraciətlərdən 92,1 faizi nazirliyin səlahiyyət dairəsinə aid məsələlərlə əlaqədar sorğu xarakteri daşıyıb və hər bir sorğuyla əlaqədar vətəndaşlara ətraflı hüquqi izahatlar verilib. Digər müraciətlərdə isə vətəndaşların təklif və şikayətləri, onların əmək və ya sosial təminat növləri üzrə hüquqlarının müəyyən edilməsi və s. məsələlər ifadə olunub və belə müraciətlər araşdırılması üçün müraciət vərəqəsi əsasında nazirliyin aidiyyəti struktur bölmələrinə təqdim olunub.

Son aylarda "Çağrı mərkəzi"nə digər bir sıra məsələlərlə yanaşı, sosial təminat, o cümlədən ünvanlı dövlət sosial yardımı ilə əlaqədar müraciətlərin sayı da azalmaqda davam edib. Belə ki, ötən ay bu məsələlərlə bağlı müraciətlərin sayında bu ilin iyul ayı ilə müqayisədə 16,2 faiz, avqust ayı ilə müqayisədə isə 5 faiz azalma müşahidə olunub. Bununla yanaşı nazirliyin elektron xidmətlərindən istifadə məsələləri ilə əlaqədar müraciətlərin sayı cari ilin iyul ayı ilə müqayisədə 55,7 faiz, avqust ayı ilə müqayisədə 41 faiz çoxalıb ki, bu da nazirliyin e-xidmətlərindən istifadəyə marağın mütəmadi olaraq artmasından xəbər verir.

Ümumilikdə, bu ilin yanvar-sentyabr aylarında Əmək və Əhalinin Sosial Müdafiəsi Nazirliyinin  142-"Çağrı mərkəzi" 78940 müraciəti cavablandırıb. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi