Azərbaycanda ilk “ASAN kommunal” mərkəzi fəaliyyətə başlayıb

Azərbaycanda ilk “ASAN kommunal” mərkəzi fəaliyyətə başlayıb Sədr müavini: “Artıq 54 sakin xidmətlərdən faydalanıb”
Sosial müdafiə
3069
16 Yanvar , 2017 12:16
Azərbaycanda ilk “ASAN kommunal” mərkəzi fəaliyyətə başlayıb

Bakı. 16 yanvar. REPORT.AZ/ "1 saylı "ASAN kommunal" Mərkəzi dünəndən, yəni yanvar ayının 15-dən etibarən vətəndaşlara xidmət göstərməyə başlayıb".

"Report" xəbər verir ki, bunu jurnalistlərə açıqlamasında Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ülvi Mehdiyev deyib.

O bildirib ki, pilot layihə çərçivəsində 1 saylı "ASAN kommunal" Mərkəzinin xidmətlərindən ilkin mərhələdə Bakı şəhərinin Nəsimi, Nərimanov və Binəqədi rayonlarında qeydiyyatda olan sakinləri yararlana biləcəklər: "Mərkəzdə "Azərişıq" ASC, "Azərsu" ASC, "Azəriqaz" İB tərəfindən 45 növ xidmət göstərilir. Burada eyni zamanda özəl şirkətlər də öz xidmətlərini vərəndaşlara çatdırır, yəni bank və sığorta şirkətləri də Mərkəzdə fəaliyyət göstərir. Artıq 54 sakin xidmətlərdən faydalanıb".

Sədr müavininin sözlərinə görə, yaxın gələcəkdə paytaxtda daha iki "ASAN kommunal" Mərkəzi istifadəyə veriləcək: "2 saylı "ASAN Kommunal" Mərkəzi dəmir yolu vağzalında, 3 saylı Mərkəz isə Ukrayna dairəsi yaxınlığında yerləşəcək. Bundan sonra bütün Bakı sakinləri qeydiyyat yerindən asılı olmayaraq mərkəzlərdən istifadə edə biləcək. Növbəti illərdə isə regionlarda kommunal mərkəzlər fəaliyyətə başlayacaq". 

Ü.Mehdiyev deyib ki, fevral ayında ikinci kommunal mərkəzin fəaliyyətə başlaması gözlənilir: "İlin birinci yarısında isə Xətai rayonundakı kommunal mərkəzin fəaliyyətə başlaması gözlənilir".  

Son xəbərlər

Orphus sistemi