"AzerGold"un yığılmış zərəri azalıb

"AzerGold" QSC-nin cəmi aktivləri 2018-ci il yanvarın 1-nə 117,786 mln. ABŞ dolları təşkil edib.

"Report" şirkətə istinadən xəbər verir ki, bu, 2017-ci il yanvarın 1-i ilə müqayisədə 16,4% azdır.

2017-ci ildə "AzerGold"un uzunmüddətli aktivləri 3% artaraq 102,931 mln. dollara çatıb, cari aktivləri isə 63,7% azalaraq 14,854 mln. dollara düşüb.

Ötən ilin əvvəlinə "AzerGold"un öhdəlikləri 116,583 mln. dolar təşkil edib ki, bu da illik müqayisədə 27,9% azdır. O cümlədən şirkətin uzunmüddətli öhdəlikləri 20,3% azalaraq 107,502 mln. dollar, cari öhdəlikləri isə 66,2% azalaraq 9,082 mln. dollar olub.

Hesabat dövründə "AzerGold" cəmi kapitalındakı 20,855 mln. dollarlıq çatışmazlıq isə 1,203 mln. dollarlıq kapitalla əvəz olunub.

2017-ci ildə "AzerGold"un qızıl satışından gəlirləri 77,306 mln. dollar (2016-cı ildə satış olmayıb), satışının maya dəyəri 62,288 mln. dollar, digər gəlirləri 150 min dollar (təxminən 50 dəfə çox), digər əməliyyat xərcləri 391 min dollar (təxminən 39 dəfə çox), dəyərsizləşmiş zərərinin geri qaytarılması üzrə gəlirləri 14,081 mln. dollar (2016-cı ildə olmayıb), ümumi və inzibati xərcləri 2,756 mln. dollar (təxminən 5 dəfə çox), maliyyə xərcləri 5,245 mln. dollar (təxminən 10 dəfə çox), mənfəət vergisi xərclərinə qənaət hesabına gəlirləri isə 1,2 mln. dollar (6% çox) təşkil edib. Son nəticədə şirkət ili 22,058 mln. dollar xalis mənfəətlə başa vurub və əvvəlki ildən qalma 22,152 mln. dollarlıq zərərini 94 min dollara endirib.

Xatırladaq ki, "AzerGold" ölkə prezidentinin 11 fevral 2015-ci il tarixli fərmanı ilə 5 iyul 2016-cı il tarixində yaradılıb. Onun nizamnamə kapitalı 2 mln. manat və yaxud o vaxtkı məzənnə ilə 1 296,6 mln. dollardır. 100% dövlətə məxsus şirkəti İqtisadiyyat Nazirliyi, Ekologiya və Təbii Sərvətlər Nazirliyi, Əmlak Məsələləri Dövlət Komitəsi təmsil edir.

"AzerGold"un fəaliyyət sahələrinə qiymətli və əlvan metal filizi yataqlarının öyrənilməsi, tədqiqi, kəşfiyyatı, idarə olunması, hasilatı, emalı və satışı, bu sahədə yeni texnologiyaların tətbiqi, maddi-texniki bazanın müasirləşdirilməsi və ondan səmərəli istifadə, habelə bu sahənin inkişafı ilə bağlı digər işlərin yerinə yetirilməsi daxildir.