“AzerGold”: “Kəlbəcərdə fəaliyyətin aparılmasına Ermənistanın basdırdığı minalar əngəl olur”

İşğaldan azad edilmiş Kəlbəcər rayonunun mina və partlamamış hərbi sursatlardan təmizlənmiş ərazilərində daha sürətlə və daha geniş miqyasda fəaliyyətin aparılmasına məhz Ermənistan tərəfindən işğal dönəmində basdırılmış minaların əngəl olur.

“Report”un “AzerGold”a istinadən verdiyi məlumata görə, bunu Səhmdar Cəmiyyətin İdarə Heyətinin sədri Zakir İbrahimov Macarıstanın ölkəmizdəki fövqəladə və səlahiyyətli səfiri Tamaş Yojef Tormanla görüşündə bildirib.

Onun sözlərinə görə, bu günədək mina xəritələri tam olaraq təhvil verilməyib.

Z. İbrahimov “AzerGold” QSC-nin fəaliyyət sahələri üzrə əldə etdiyi nailiyyətlər, cəmiyyətin strateji planları və dağ-mədən sektorunda görülən işlər haqqında bəhs edib. O, Macarıstan heyətinə Azərbaycan Prezident, Müzəffər Ali Baş Komandan İlham Əliyevin rəhbərliyi ilə Ordumuzun əldə etdiyi zəfər nəticəsində azad edilmiş Kəlbəcər rayonunun mina və partlamamış hərbi sursatlardan təmizlənmiş ərazilərində Cəmiyyətin icra etdiyi geoloji axtarış işləri ilə bağlı məlumat verib.

Z.İbrahimov ətraf mühitin mühafizəsinin “AzerGold”un əsas prioritetlərindən biri olduğunu qeyd edərək, hasilat sahələrində mövcud ekoloji monitorinq proqramına uyğun olaraq hava, su və torpaq nümunələrinin mütəmadi olaraq yoxlanıldığını toz, səs-küy və vibrasiya testlərinin aparıldığını diqqətə çatdırıb. Cəmiyyətin qabaqcıl istehsal texnologiyaların transferi, elmtutumlu və innovativ yanaşmaların geniş tətbiqində maraqlı olduğu qeyd edən Z.İbrahimov şirkətin nümayəndələrini hasilat sahələri ilə tanışlığa dəvət edib.

Səfirliyin Ticarət və iqtisadi məsələlər üzrə attaşesi, eləcə də Macarıstanın “Vibrocomp” şirkətinin nümayəndəsinin iştirak etdiyi görüşdə diplomatik nümayəndəliyin iki ölkə arasında bir çox istiqamətlərdə mövcud əməkdaşlığın güclənməsində xidmətlərini xüsusi vurğulayan sədr Macarıstanın ölkəmizin vaxtı ilə işğal altında olmuş əraziləri ilə bağlı beynəlxalq hüquqa, tarixi ədalətə söykənən mövqeyini daim dəstəklədiyinə görə təşəkkür edib. Z.İbrahimov iki ölkə arasındakı əlaqələrin dostluğa və qarşılıqlı hörmətə əsaslandığını qeyd edib.

Azərbaycanın Macarıstan üçün vacib tərəfdaş olduğunu qeyd edən Tamaş Yojef Torma ölkəsinin enerji təhlükəsizliyinin təmin edilməsində Azərbaycanın mühüm rol oynadığını bildirib. Diplomat ölkələrimiz arasında münasibətlərin zəngin tarixə malik olduğunu vurğulayıb, hazırda da iki ölkə arasındakı əlaqələrin yüksək səviyyədə olmasından məmnunluğunu ifadə edib.

Səfir Macarıstanın Azərbaycanın işğaldan azad olunmuş ərazilərində quruculuq işlərinə də yaxın gələcəkdə töhfənin verilməsinə ümidvar olduğunu bildirərək, bunu dostluq münasibətinin növbəti təzahürü kimi qiymətləndirib.

Daha sonra Macarıstanın səs-küy, hava və vibrasiya ilə ətraf mühitin çirklənməsinin nəticələrinin yumşaldılmasının proqnozlaşdırılması, ölçülməsi, modelləşdirilməsi və planlaşdırılması sahəsində innovativ və yüksək keyfiyyətli yanaşmalarla texnoloji həllər, texniki yardım və məsləhət xidmətləri təqdim edən “Vibrocomp” şirkəti haqqında məlumat verilib.

Sonda qarşılıqlı maraq doğuran məsələlər ətrafında geniş fikir mübadiləsi aparılıb. İki ölkə arasında iqtisadi əməkdaşlığın qiymətləndirilməsi baxımdan görüşün olduqca faydalı olduğu diqqətə çatdırılıb.