Aviaqəzada xəsarət alanlardan birinin sabah əməliyyatı planlaşdırılır

Aviaqəzada xəsarət alanlardan birinin sabah əməliyyatı planlaşdırılır.

"Report"un məlumatına görə, bunu Yeni Klinikanın direktor müavini, transpalantologiya şöbəsinin direktoru Eldar Əhmədov jurnalistlərə açıqlamasında deyib.

Onun sözlərinə görə, yaralananlardan birinə baldır sümüyündə açıq qəlpəli sınıq dioqnozu qoyulub:

"Həmin xəstə osteosintez əməlliyyatına alınacaq".

E.Əhmədov bildirib ki, vəziyyəti ağır olan bir yaralı reanimasiyadadır:

"Orta ağır və kafi vəziyyətdə olan xəstələr isə stasionardadır. Yaralılara bədənin müxtəlif küt travmaları, sümük sınıqları diaqnozu qoyulub".

Qeyd edək ki, Yeni Klinikaya gətirilmiş 14 xəstədən 13-ü palata şəraitində, biri isə reanimasiyada müalicə alır.

Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Avialaynerin göyərtəsində olan 67 nəfərdən 42-si Azərbaycan, 16-sı Rusiya, 6-sı Qazaxıstan, 3-ü isə Qırğızıstan vətəndaşı olub. Onlardan 38-i həlak olub, 29-u sağ qalıb.

Qəzadan sonra xəstəxanaya 27 şəxs daxil olub. Onlardan 15 nəfər Azərbaycan Respublikasının, 8 nəfər Rusiya Federasiyasının, 3 nəfər Qırğızıstan Respublikasının vətəndaşıdır. Bir nəfərin şəxsiyyəti, hələlik müəyyən edilməyib.

Hər iki pilot da daxil olmaqla 3 ekipaj üzvü həlak olub, 2 ekipaj üzvü isə sağ qalıb.

Dekabrın 26-da Azərbaycana 14 yaralı və 4 nəfərin cəsədi gətirilib.

Qeyd edək ki, hadisədən sonra dövlət başçısının tapşırığı ilə təyyarə qəzasının səbəblərinin araşdırılması üçün Baş nazir Əli Əsədovun rəhbərliyi ilə Dövlət Komissiyası yaradılıb.

Eyni zamanda Prezident İlham Əliyev çoxsaylı insan itkisindən sonra dekabrın 26-nın ölkə ərazisində bir günlük matəm elan olunması ilə bağlı sərəncam imzalayıb.