Zelenski dostunu Təhlükəsizlik Xidmətinin rəisi vəzifəsindən uzaqlaşdırır

Ukrayna Prezidenti Volodimir Zelenski Ukrayna Təhlükəsizlik Xidmətinin (UTX) rəisi İvan Bakanovu vəzifədən uzaqlaşdırmaq istəyir.

“Report” xəbər verir ki, bunu “Politico” qəzeti Ukrayna liderinə yaxın olan dörd məmura, həmçinin UTX üçün zəruri islahatlarla bağlı Kiyevə məsləhət verən qərb diplomatına istinadən yazıb.

Nəşrin həmsöhbətlərindən biri iddia edib ki, UTX rəisinin işindən son dərəcə narazıdırlar: “Onun idarəçilik bacarıqları bizi qane etmir, çünki indi böhran idarəçiliyi bacarıqlarına ehtiyacımız var, bizim fikrimizcə, onda bu keyfiyyətlər yoxdur”.

Məqalədə qeyd olunub ki, İ.Bakanov V.Zelenskinin uşaqlıq dostudur. İkinci dövlət başçısı seçiləndən sonra UTX-ya rəhbərliyi dostuna etibar edib. Amma indi onu müharibə dönəmində vəzifəyə daha uyğun olan biri ilə əvəz etmək qərarına gəlib.

Mənbələrin sözlərinə görə, Rusiyanın Ukraynada müharibəyə başlamasından sonra təkcə İ.Bakanovun işi deyil, həm də təhlükəsizlik xidmətinin yüksəkvəzifəli məmurlarının verdiyi qərarlar narahatlıq doğurur. Onların qənaətincə, ilk saatlarda və günlərdə qəbul etdikləri qərarlar “ölkənin qiymətli ərazilərinə, o cümlədən strateji əhəmiyyətli Xerson şəhərinə baha başa gəlmiş ola bilər”.

Ukraynanın yüksəkvəzifəli məmuru nəşrə bildirib ki, müharibə başlayanda ölkənin bir çox bölgələrində UTX rəhbərləri özlərini çox qəribə aparıblar, qaçıblar və hətta onlardan biri Çerniqovda sənədləri çıxarmağa vaxtı olmadığına görə UTX-nın bütün binasını yandırıb.

“Politico” qeyd edib ki, UTX sovet dövründəki Dövlət Təhlükəsizlik Komitəsinin (DTK) varisidir. 30 000-dən çox işçisi olan UTX-nın əməkdaşlarının sayı Böyük Britaniyanın təhlükəsizlik xidməti olan “MI5”dan yeddi dəfə çoxdur. Eyni zamanda ölkənin ABŞ-dan 16 dəfə kiçik olmasına baxmayaraq, təhlükəsizlik xidmətindəki əməkdaşların sayı, təqribən, ABŞ-ın Federal Təhqiqat Bürosundakı (35 000) qədərdir.

UTX-nın ənənəvi olaraq daxili kəşfiyyat və əks-kəşfiyyat məlumatlarının toplanması ilə məşğul olmasına baxmayaraq, təhlükəsizlik orqanının fəaliyyəti Qərb dövlətlərindəki analoji qurumların fəaliyyətinin əhatə dairəsindən kənara çıxır. Belə ki, onun vəzifələrinə həmçinin iqtisadi cinayətlərə və korrupsiyaya qarşı mübarizə də daxildir.