Ukraynalı ekspert: "Dünyada böyüməkdə olan ərzaq böhranı Rusiyanın Qara dənizi blokadaya almasının nəticəsidir"

Ukraynalı ekspert: "Dünyada böyüməkdə olan ərzaq böhranı Rusiyanın Qara dənizi blokadaya almasının nəticəsidir" Hazırda dünyada böyüməkdə olan ərzaq böhranı Rusiyanın Qara dənizdə törətdiklərinin, dənizi blokadaya almasının nəticəsidir.
Region
26 İyul , 2022 14:00
Ukraynalı ekspert: Dünyada böyüməkdə olan ərzaq böhranı Rusiyanın Qara dənizi blokadaya almasının nəticəsidir

"Hazırda dünyada böyüməkdə olan ərzaq böhranı Rusiyanın Qara dənizdə törətdiklərinin, dənizi blokadaya almasının nəticəsidir".

Bunu “Report”un Şərqi Avropa bürosuna açıqlamasında ukraynalı ekspert Aleksandr Kovalenko deyib.

Rusiyanın Odessa limanına zərbələr endirməsi ilə bağlı ekspert bildirib ki, bununla Rusiya imzaladığı sazişin müddəalarını pozub: “Bu, bir daha sübut edir ki, Rusiya tərəfinin hər hansı sazişin, müqavilənin altında atdığı imzanın heç bir dəyəri yoxdur. Vəziyyət isə gərgin olaraq qalır. Bu, Rusiyanın mövcud vəziyyəti həll etməyə çalışmadığını göstərir”.

A.Kovalenko vurğulayıb ki, Ukraynadan taxıl ixracı həyata keçiriləcək: “Bu hücum çox şeydən xəbər verir, amma o, hansısa ölkələrin rifahının deyil, insanların həyatının asılı olduğu bir prosesin qarşısını tam almaq iqtidarında deyil. Məsələn, Mərkəzi Afrika ölkələrində ilin sonunadək aclığın, Aİ ölkələrinə kütləvi və qanunsuz miqrasiyanın olub-olmayacağı konkret olaraq Ukrayna taxılından asılıdır. Aclıq, iqtisadi çöküş səbəbindən Afrika ölkələrində sabitliyin pozulub-pozulmayacağı, radikalizm və terrorizmin baş qaldırıb-qaldırmayacağı da məhz Ukrayna taxılının ixracından asılıdır. İstisna etmirəm ki, İŞİD kimi terror təşkilatı Afrika ölkələrində mövcud olan sosial inamsızlıqdan özünə yeni əməliyyat meydanı yaratmaq, baş qaldırmaq və gələcək terror fəaliyyətini genişləndirmək üçün istifadə edə bilər. Biz bu problemin nə dərəcədə qlobal olduğunu başa düşürük. Buna görə də hesab edirəm ki, bu sazişlərdə əks olunmuş müsbət müddəaları heç kim ləğv etmək istəməyəcək”.

Ekspert diqqətə çatdırıb ki, Rusiya tərəfi bu müddəaların yerinə yetirilməsinə hər vəchlə mane olmağa çalışacaq, yəni Ukraynanın taxıl daşınan limanlarına zərbələr endirməkdə davam edəcək: “Çünki bu, onun maraqlarına cavab verir. Rusiya ərzaq böhranı yaratmaq və onu dərinləşdirməklə beynəlxalq ictimaiyyəti təzyiq altında saxlamaq və şantaj etmək istəyir. Bu səbəbdən, məncə, Rusiyanın davamlı təzyiqlərinə baxmayaraq, bu sazişlərin problemli müddəaları yerinə yetiriləcək”.

Xatırladaq ki, iyulun 22-də İstanbulda Ukrayna, Türkiyə və Rusiya BMT-nin Baş katibi Antonio Quterreşin dəstəyi ilə Odessa, Çernomorsk və Pivdennıy dəniz limanlarından taxılın, əlaqədar ərzaq məhsullarının və gübrələrin (ammonyak da daxil olmaqla) ixracı üçün təhlükəsiz daşımaların təşviqi barədə razılığa gəliblər. Sazişə əsasən, razılaşma sonradan uzadılma ehtimalı ilə 120 gün üçün nəzərdə tutulub.

İyulun 23-də səhər saatlarında isə Rusiya Silahlı Qüvvələri Odessa dəniz ticarət limanına “Kalibr” tipli qanadlı raketlərlə zərbələr endirib. İki raket hava hücumundan müdafiə qüvvələri tərəfindən vurulub, ikisi isə liman infrastrukturunun obyektlərinə dəyib.

Son xəbərlər

Orphus sistemi